ნიკოლ ფაშინიანი გადადგომაზე უარს ამბობს

რეგიონი

18.11.2020

სომხეთის პრემიერ-მინისტრი ნიკოლ ფაშინიანი აცხადებს, რომ არ აპირებს გადადგომას და იშრომებს იმისათვის, რომ გადაილახოს კრიზისული სიტუაცია.

ოპოზიციის მხრიდან მისი გადადგომის მოწოდებისა და ანტისამთავრობო აქციების მიუხედავად, ნიკოლ ფაშინიანი აცხადებს, რომ ქვეყანაში მასშტაბური რეფორმების განხორციელებას აპირებს. მან 2021 წლის სამოქმედო გეგმა წარადგინა.

პრემიერ-მინისტრის განმარტებით, არსებული სიტუაციის გამო ის თავს მთავარ პასუხისმგებელ პირად თვლის, ისევე, როგორც საკუთარ პასუხისმგებლობად მიიჩნევს, ქვეყანაში სტაბილურობა და უსაფრთხოება დაამყაროს.

სამოქმედო გეგმა ითვალისწინებს ყარაბაღის საკითხზე მოლაპარაკებების პროცესის აღდგენას ეუთოს მინსკის ჯგუფის თანათავმჯდომარეების ფორმატში მთიანი ყარაბაღის სტატუსზე აქცენტის გაკეთებით, ასევე ყარაბაღის მცხოვრებლების თავიანთ სახლებში დაბრუნებას და მთიანი ყარაბაღის ხელისუფლების კონტროლქვეშ არსებულ ტერიტორიებზე მდებარე დაზიანებული სახლებისა და ინფრასტრუქტურის აღდგენას.

გეგმა ასევე ითვალისწინებს სამხედრო რეფორმების პროგრამის დამტკიცებას და აღნიშნული რეფორმების დაწყებას, კორონავირუსის პანდემიის გადალახვასა და მისი შედეგების აღმოფხვრას, ეკონომიკური საქმიანობის გარემოს აღდგენას, საარჩევნო კოდექსში ცვლილებების შეტანას, სპეციალიზებული მოსამართლეების ინსტიტუტის დანერგვას, რაც, გეგმის თანახმად, ანტიკორუფციული სასამართლოს დაფუძნებისკენ გადადგმული პირველი ნაბიჯი უნდა გახდეს.

ამასთან, ფაშინიანის მიერ წარდგენილი სამოქმედო გეგმა ითვალისწინებს მუდმივი თემატური კონსულტაციების გამართვას სომხეთის პოლიტიკური და სამოქალაქო საზოგადოების წარმომადგენლებთან.

ნიკოლ ფაშინიანის განმარტებით, სამოქმედო გეგმით გათვალისწინებული პროგრამების რეალიზაციას 6 თვე დასჭირდება. 2021 წლის ივნისში კი ის მოხსენებას წარადგენს და მომავალი მოქმედებების შესახებ გადაწყვეტილების მიღება საზოგადოებრივი აზრისა და რეაქციის გათვალისწინებით მოხდება.