უკრაინა 1.5 მილიონზე მეტმა ადამიანმა დატოვა - გაერო

რეგიონი

06.03.2022

გაეროს ლტოლვილთა უმაღლესი კომისრის, ფილიპო გრანდის განცხადებით, ბოლო 10 დღის განმავლობაში მეზობელ ქვეყნებში უკრაინიდან 1,5 მილიონზე მეტი ადამიანი გადავიდა, - ამის შესახებ ინფორმაციას BBC ავრცელებს.

ფილიპო გრანდის განმარტებით, უკრაინაში მიმდინარე სამხედრო დაპირისპირება მეორე მსოფლიო ომის შემდეგ ევროპაში ყველაზე სწრაფად მზარდი ლტოლვილთა კრიზისი გახდა.

24 თებერვალს რუსეთის სამხედრო შეჭრის დაწყებიდან უკრაინაში 350-ზე მეტი მშვიდობიანი მოქალაქე დაიღუპა, მათ შორის 28 ბავშვი და 707 ადამიანი დაშავდა.

მონაცემებს გაეროს ადამიანის უფლებათა უმაღლესი კომისარიატი ავრცელებს.

სტატისტიკა რეგიონების მიხედვით: დონეცკისა და ლუგანსკის რაიონებში 86 დაიღუპა და 385 დაიჭრა. კერძოდ, 355 - უკრაინის მიერ კონტროლირებად ტერიტორიაზე, 116 - ოკუპირებულ ტერიტორიაზე უკრაინის სხვა რეგიონებში 265 დაიღუპა და 322 დაშავდა.

ადამიანის უფლებათა ბიუროს ცნობით, მსხვერპლის უმეტესობა დიდი ფართობის ასაფეთქებელი იარაღით, მათ შორის მძიმე არტილერიით და მრავალჯერადი სარაკეტო თავდასხმებით, ასევე სარაკეტო და საჰაერო დარტყმებით არის გამოწვეული.

შეგახსენებთ, რომ 3 მარტს დასახლებულ პუნქტებზე რუსი სამხედროების მიერ საჰაერო დარტყმების შედეგად ჩერნიგოვში სულ მცირე 47 ადამიანი დაიღუპა. იმავე დღეს, ჰააგის საერთაშორისო ტრიბუნალმა უკრაინაში რუსეთის შეჭრის შედეგად ჩადენილი ომისა და კაცობრიობის წინააღმდეგ ჩადენილ დანაშაულებზე გამოძიება დაიწყო.

რუსეთის უკრაინაში შეჭრის დღიდან ამ დრომდე, ქვეყანაში 140 00 უკრაინელი დაბრუნდა. ამის შესახებ ინფორმაციას უკრაინის შინაგან საქმეთა სამინისტრო ავრცელებს.

უწყების ცნობით, დაბრუნებული მოქალაქეების 80% მამაკაცია.