კიევში გლოვის დღეა

რეგიონი

კიევში გლოვის დღეა

09.07.2024

კიევში დღეს გლოვის დღეა, სადაც პატივს მიაგებენ დედაქალაქზე რუსული სარაკეტო დარტყმის შედეგად დაღუპულთა ხსოვნას.

კიევის ბავშვთა მთავარ საავადმყოფოზე თავდასხმის შემდეგად, ბოლო ინფორმაციით, დაღუპულია 37, დაშავებული კი 170-ზე მეტია, მათ შორის ბავშვები.

მომხდარს ამერიკის შეერთებული შტატების პრეზიდენტმა, რუსეთის სისასტიკის შემზარავი შეხსენება უწოდა.

მისი თქმით, ამ კვირაში ის უკრაინელ კოლეგას ვოლოდიმირ ზელენსკის შეხვდება და მოკავშირეებთან ერთად გამოაცხადებს "ახალ ზომებს უკრაინის საჰაერო თავდაცვის გასაძლიერებლად".

კიევის საქალაქო სამხედრო ადმინისტრაცია 21:22 საათისთვის [უკრაინის დროით] არსებულ მონაცემებს ავრცელებს.

სარაკეტო იერიშის შედეგად, დაზიანდა 7 რაიონი - სოლომიანსკის, დნიპროვსკის, დარნიცკის, სვიატოშინსკის, დესნიანსკის, შევჩენკოვის და ჰოლოსიევსკის.

შევჩენკოვის რაიონში დაინგრა ბავშვთა საავადმყოფო "ოჰმატდეტის" შენობის ორი სართული, საერთო ფართობით დაახლოებით 400 კვადრატული მეტრი. დაიღუპა 2 ზრდასრული ადამიანი, მათგან ერთი ექიმი და 10 დაშავდა. დაზიანდა კიდევ რამდენიმე შენობა. სამაშველო სამუშაოები და ადამიანების ძებნა ამ დრომდე გრძელდება.

მთლიანად დაინგრა ამავე რაიონში ერთ-ერთი მრავალსართულიანი საცხოვრებელი კორპუსის ერთი სადარბაზო, დანარჩენი დაზიანდა. დაიღუპა 7 ადამიანი, მათ შორის 3 ბავშვია, დაშავდა 18, გადაარჩინეს 7 ადამიანი. სამაშველო სამუშაოები გრძელდება.

დაზიანდა სამრეწველო ობიექტიც, სადაც 2 ადამიანი დაიღუპა და 3 დაშავდა.

სოლომიანსკის რაიონში დაინგრა ბიზნეს ცენტრის ორი სართული - საერთო ფართი 1500 კვადრატული მეტრი. გაჩნდა ხანძარიც. აღნიშნულ ტერიტორიაზე დაიღუპა 7 ადამიანი და დაშავდა 9. სამაშველო სამუშაოები დასახელებულ ადგილას დასრულებულია.

ჰოლოსიევსკის რაიონში ნაწილობრივ დაინგრა 5 სართულიანი საცხოვრებელი კორპუსი, დაშავდა 22 ადამიანი. მიმდებარედ დაზიანდა საბავშვო ბაღი, ავტოფარეხები და ცეცხლი გაუჩნდა 10 მანქანას.

დნიპროვსკის რაიონში თავდასხმის შედეგად ოთხსართულიანი სამედიცინო ცენტრის შენობა ნაწილობრივ განადგურდა. დაიღუპა 9 და დაშავდა 5 ადამიანი. სამაშველო სამუშაოები დასრულებულია.

დედაქალაქის დარნიცის რაიონში კერძო სახლი დაზიანდა. დაშავდა 1 ადამიანი. პარალელურად, ხანძარი გაჩნდა დესნიანის რაიონში მდებარე ორსართულიან კერძო სახლში, რომეიც ამ დროისათვის ლიკვიდირებულია.

სვიატოშინის რაიონში, თავდასხმის შედეგად, ხანძარი გაჩნდა სამრეწველო შენობაში. ცეცხლი ლიკვიდირებულია. დაზიანდა კერძო სახლები და კოლეჯის შენობა. დაშავდა 5 ადამიანი.