,,აწარმოე საქართველოში" დაფინანსების რაოდენობა გაიზარდა
ეკონომიკისა და მდგრადი განვითარების სამინისტროს სააგენტო „აწარმოე საქართველოში“ მიკრო და მცირე მეწარმეობის ხელშეწყობის კომპონენტს 2018 წელს ახალი პირობებით განაგრძობს.
მიკრო და მცირე მეწარმეობის ხელშეწყობის სახელმწიფო საგრანტო პროგრამა 2018 წლის 20 აგვისტოდან ახალი პირობებით განახლდება და 2 სექტემბრის ჩათვლით გაგრძელდება. დაფინანსების მაქსიმალური მოცულობა 15 000 ლარის ნაცვლად, 20 000 ლარია.
საგრანტო კონკურსში მონაწილეობა შეუძლია პირს, რომელსაც პროგრამის ფარგლებში დაფინანსება არასდროს მიუღია, ასევე - მეწარმე სუბიექტს ან მეწარმე სუბიექტთა ჯგუფს, რომელმაც აღნიშნული პროგრამიდან გრანტი ერთხელ უკვე მიიღო. განმეორებით მხოლოდ წარმატებული სტარტაპები დაფინანსდება. პროექტი უნდა ეხებოდეს მათთვის უკვე დაფინანსებული საქმიანობის გაფართოება/გადაიარაღებას.
განმეორებითი დაფინანსების მისაღებად, პროგრამაში თანამონაწილეობის წილი განისაზღვრება დაფინანსების თანხის არანაკლებ 50 პროცენტით, მაშინ როდესაც პროგრამის ახალი ბენეფიციარის მიერ პროგრამაში თანამონაწილეობის წილი განისაზღვრება დაფინანსების თანხის არანაკლებ 20 პროცენტით.
პროგრამაში მონაწილეობა შეუძლია საქართველოს მოქალაქე ფიზიკურ პირს, რომელიც განაცხადის შევსების მომენტში სრულწლოვანია.
წელს პროგრამის პრიორიტეტებია ინტელექტუალური სერვისები, ქალი მეწარმე, სტარტაპი და სოფლად განხორციელებული ბიზნესი.
დაფინანსების მიღებამდე მონაწილემ აუცილებელია გაიაროს რამდენიმე ეტაპი: ონლაინ აპლიკაციის შევსება: http://www.enterprisegeorgia.gov.ge; ბიზნესიდეების კონკურსი: საუკეთესო ბიზნესიდეების ავტორების გამოვლენა; საუკეთესო ბიზნესიდეების ავტორებს ჩაუტარდებათ ბიზნესგეგმის წერის ტრენინგი; მომზადებული ბიზნესგეგმების კონკურსი;
პროგრამის ხანგრძლივობა 14 თვეა. გრანტის გაცემა მოხდება განაცხადის შევსებიდან 6 თვეში, 2018 წლის ნოემბერ-დეკემბერში. პროგრამა ხორციელდება საქართველოს მთელ ტერიტორიაზე, გარდა თბილისისა.
პროგრამას რეგიონებში შემდეგი ორგანიზაციები ახორციელებენ:
აჭარა, გურია, სამეგრელო-ზემო სვანეთი – შპს. ჯი-ემ-სი-ჯი - INNOVA;
კახეთი, მცხეთა-მთიანეთი, შიდა ქართლი – შპს თბილისის ბიზნეს ტრენინგის ცენტრი;
სამცხე-ჯავახეთი, ქვემო ქართლი – რეგიონალური განვითარების ასოციაცია;
იმერეთი, რაჭა-ლეჩხუმი, ქვემო სვანეთი – საქართველოს სკაუტური მოძრაობა - საქართველოს სკაუტები;
სააგენტოს „აწარმოე საქართველოში“ მიკრო და მცირე ბიზნესის მხარდაჭერის კომპონენტი ხელს უწყობს რეგიონული მოსახლეობის გააქტიურებას, წამოიწყონ ან გააფართოონ საკუთარი ბიზნესი.
არ დაფინანსდება სოფლის მეურნეობის პირველადი წარმოება და მისთვის განკუთვნილი მომსახურება.
2015-2018 წლის მონაცემებით, მხარდაჭერილია 5 313 პროექტი, რომელთა ჯამური ინვესტიციის მოცულობა 50 მლნ ლარამდეა. ამასთან, თანადაფინანსების სახით გაიცა 22 949 474 ლარი, სადაც 8 412 მოსარგებლეა.