სახელმწიფო ბიუჯეტი დაახლოებით 140 მილიონი ლარით შეცირდა – ამის შესახებ მთავრობის დღევანდელ სხდომაზე ფინანსთა მინისტრმა ნოდარ ხადურმა განაცხადა. საქართველოს სახელმწიფო ბიუჯეტში არსებული დეფიციტის შესავსებად, თანხის დაზოგვის მიზნით, მთავრობამ არა მხოლოდ სამინისტროებს, არამედ ადგილობრივ თვითმმართველობებსაც მიმართა.
შინაგან საქმეთა სამინისტრო 15 მილიონი ლარით, ენერგეტიკისა და თავდაცვის სამინისტროები – 5 მილიონით, გარემოსა და ბუნებრივი რესურსების დაცვის სამინისტროს ბიუჯეტი კი ორ მილიონამდე ლარით შემცირდა. ეს იმ უწყებათა ნაწილია, რომლებსაც დაფინანსება მოაკლდათ და მათ ხარჯზე სახელმწიფო ბიუჯეტში თანხა 140 მილიონი ლარის ოდენობით დაიზოგა. დღევანდელ მთავრობის სხდომაზე მთავრ ფინანსურ დოკუმენტში შესული ცვლილებები და მისი საბოლოო ვარიანტი პრემიერს ქვეყნის ფინანსთა მინისტრმა გააცნო.
საქართველოს სახელმწიფო ბიუჯეტში არსებული დეფიციტის შესავსებად, მთავრობამ თანხის დაზოგვის მიზნით, არა მხოლოდ სამინისტროებს, არამედ ადგილობრივ თვითმმართველობებსაც მიმართა. ახალციხის მუნიციპალიტეტის გამგეობაში ამბობენ, რომ მათი ადგილობრივი ბიუჯეტი ისეც მცირეა, ამიტომ თანხის დაზოგვა ვერ ხერხდება, რაც შეეხება მერიას, საფინანსო–საბიუჯეტო სამსახური განმარტავს, რომ ე.წ ,,ქამრების შემოჭერის“ პროცესი მათთან აპრილის თვეში განხორციელდა. რის შედეგადაც, შემცირდა 5 000 ლარით სატელეკომუნიკაციო ხარჯები, 8 000 ლარით – საწვავის ხარჯები და ამდენივე დაიზოგა წარმომადგენლობით ხარჯებზე. იმ პერიოდში მერიაში განმარტეს, რომ ეს ,,ქამრების შემოჭერის“ პირველი ეტაპი იყო , თუმცა მას შემდეგ თანხის დაზოგვა არ მომხდარა.
ბიუჯეტის დაზოგვის მიზნით, იუსტიციის სამინისტრომ გარკვეული ტიპის მშენებლობები გააუქმა: საჯარო რეესტრის სათაო ოფისი, მცხეთის იუსტიციისა და 2 სოფლის სახლი. გარდა ამისა, ცვლილებები შეეხო, სოფლის მეურნეობის სამინისტოსაც. შემცირდა საკომუნიკაციო და საწვავთან დაკავშირებული ხარჯები, ასევე, სამეცნიერო კვლევითი მიმართულების კუთხით დაგეგმილი პროექტების დაფინანსება. გარკვეულ უწყებებში დაფინანსების შემცირებას ეკონომისტი ნუგზარ თათეშვილი დადებითად აფასებს. მისი თქმით, თანხის დაზოგვა იმ უწყებებში მოხდა, რომლებზეც ყველაზე მეტი ადმინისტრაციული ხარჯი მოდიოდა. გარდა ამისა, ეკონომისტის აზრით, მნიშვნელოვანია, რომ ცვლილება ინფრასტრუქტურისა და სოციალურ მიმართულებებს არ შეხებია.
ქვეყნის 2015 წლის მთავრი ფინანსური დოკუმენტი საქართველოს პარლამენტმა გასული წლის დეკემბრის თვეში დაამტკიცა, რომელიც 9 მილიარდ 875 მილიონ ლარს შეადგენდა. საბოლოოდ შესული კორექტივების შემდეგ კი ბიუჯეტი 140 მილიონით დაიზოგა. ფინანსთა სამინისტროში განმარტავენ, რომ თანხის გარკვეული ნაწილი კაპიტალურ პროექტებს მოხმარდება.