ახალციხის მოსახლეობა ქვეყანაში არსებულ ეკონომიკურ მდგომარეობაზე საუბრობს. ადგილობრივების გარკვეული ჯგუფი მძიმე სოციალურ ფონზე ჩივის და ამბობს, რომ სიტუაცია ლარის გაუფასურებამ დაამძიმა.
უმუშევრობა, მძიმე სოციალური ფონი , დოლარის კურსის ზრდა–ეს ის საკითხებია, რომლებიც ახალციხის ბაზარში შეკრებილ ადგილობრივებს, მყიდველებსა და მოვაჭრეებს ერთნაირად აწუხებთ. მოსახლეობის გარკვეული ჯგუფი ქვეყანაში მიმდინარე ეკონომიკურ მდგომარეობას აფასებს და ამბობს, რომ თუ ლარის კურსი კიდევ დაიწევს, ხალხი კრიზისულ მდგომარეობაში აღმოჩნდება.
მოსახლეობაში უმუშევრობაზეც ჩივიან და ამბობენ, რომ ქვეყანაში სამუშაო ადგილები არ არის. მათი თქმით, ახალგაზრდები დასაქმებულები არ არიან, ეს კი სოციალურ ფონს უფრო მეტად ამძიმებს.
ახალციხის ბაზრის მოვაჭრეები ამბობენ, რომ გასულ წლებთან შედარებით, მყიდველთა რაოდენობამ იკლო. მათი თქმით, მოსახლეობა მხოლოდ ყველაზე აუცილებელ პროდუქტს ყიდულობს. კლიენტთა სიმცირე კი მათ მუშაობაზე უარყოფითად აისახება. ადგილობრივები ამბობენ, რომ თუ ხელისუფლებამ მდგომარეობის გასაუმჯობესებლად გარკვეული ნაბიჯები არ გადადგა, საზოგადოებაში მთავრობის მიმართ ნდობის მაჩვენებელი დაეცემა.
ეკონომიკა ციფრებზეა დამყარებული თუმცა მოსახლეობის სოციალურ მდგომარეობას, ეს რიცხვები ხშირ შემთხვევაში ზუსტად არ ასახავს – აცხადებს პროსფესორი როინ თათეშვილი. ექსპერტის თქმით ქვეყანაში სოციალური ფონის დამძიმება ეროვნული ბაკნის პრეზიდენტისა და ქვეყნის ეკონომიკური გუნდის არაკოორდინირებულმა მუშაობამ განაპირობა. როინ თათეშვილის მტკიცებით, ქვეყნის ეკონომიკურ ზრდას სწორი ხედვა და კარგი მენეჯმენტი სჭირდება.
სანამ ახალციხის ბაზარში შეკრებილი მოვაჭრეები და მყიდველები ქვეყნის მომავალზე მსჯელობენ, მანამდე ცენტრალურ ხელისუფლებაში მინისტრთა კაბინეტის ცვლილება მიმდინარეობს. რამდენად შეცვლის ქვეყანაში არსებულ სიტუაციას გადახალისებული გუნდი – ეს ცნობილი ახლო მომავალში გახდება.