საქართველოს ეკონომიკისა მინისტრი გიორგი კვირიკაშვილი და აზერბაიჯანის ტრანსპორტის მინისტრი ზია მამედოვი ბაქო-თბილისი-ყარსის სარკინიგზო ხაზის ქართული მონაკვეთის პრეზენტაციას და სატესტო მატარებლის გავლას დაესწრნენ. საპრეზენტაციო ღონისძიება 28 იანვარს ჯავახეთში გაიმართა. ბაქო-თბილისი-ყარსის სარკინიგზო ხაზზე კარწახის მონაკვეთში სამმა სატესტო მატარებელმა გაიარა.
საქართველოსა და აზერბაიჯანის წარმომადგენლებმა პროექტის მნიშვნელობასა და მომავალ პერსპექტივებზე ისაუბრეს. გიორგი კვირიკაშვილის განცხადებით, ყველაფერი გაკეთდება იმისთვის, რომ ბაქო-თბილისი-ყარსის რკინიგზის სამუშაოები წლის ბოლომდე დასრულდეს. მისივე თქმით, რკინიგზის მშენებლობა 180 კილომეტრზე, ფაქტობრივად, დამთავრებულია. მინისტრმა აღნიშნა, რომ პროექტი, მნიშვნელოვანია, როგორც ეკონომიკური კუთხით, ისე ხალხთა შორის კავშირების გამყარების თვალსაზრისით.
ბაქო-თბილისი-ყარსის რკინიგზა რეგიონის ყველაზე მნიშვნელოვან პროექტად არის დასახელებული. უკანასკნელი ორი წლის განმავლობაში საქართველოს, აზერბაიჯანსა და თურქეთს შორის გამართულ სხვადასხვა დონის შეხვედრაზე აქტიურად განიხილებოდა საკითხი იმის შესახებ, რომ 2014 წლის ბოლოს ქართულ მონაკვეთზე პირველ სატესტო მატარებელს უნდა გაევლო. დათქმული ვადების შესაბამისად, შპს “მარაბდა-კარწახის რკინიგზამ” ლიანდაგის დაგება მთელ მონაკვეთზე დაასრულა. აზერბაიჯანის ტრანსპორტის მინისტრმა ზია მამედოვმა აღნიშნა, რომ ხელისუფლების ნების პირველი ეტაპი შესრულებულია.
ახალ რკინიგზას წელიწადში 1 მილიონი მგზავრის გადაყვანისა და, პირველ ეტაპზე, 5 მილიონი ტონა ტვირთის გატარების პოტენციალი ექნება. სატვირთო მოცულობა მუდმივად გაიზრდება და მეორე ეტაპისთვის წელიწადში 15–ი მილიონი ტონა ტვირთის გადაზიდვა იგეგმება. რკინიგზის ამოქმედების შემდეგ დამატებით, 2500 ადამიანი დასაქმდება.