რელიგიის საკითხთა სახელმწიფო სააგენტომ მოხის სადავო შენობასთან დაკავშირებით, ახალციხეში შეხვედრა დაასრულა. მართლმადიდებელ და მუსლიმ სასულიერო პირებთან ერთად, ზაზა ვაშაყმაძემ პრობლემის მოგვარებაზე იმსჯელა.

შეხვედრაზე მუსლიმი მრევლისთვის ორი შეთავაზება გაჟღერდა: 1. სახელმწიფო გამოისყიდის სახლს, სადაც ისინი ამ დრომდე ლოცულობენ და გადასცემს მუსლიმებს, ან 2. გამოიყოფა ალტერნატიული ფართი, სადაც სახელმწიფოს ხარჯებით ახალი მეჩეთი აშენდება.

დასავლეთ საქართველოს მუფთი ბეგლარ ქამაშიძე აცხადებს, რომ ორივე შეთავაზებას მუსლიმთა სამმართველოსთან ერთად განიხილავს.

ახალციხისა და ტაო კლარჯეთის მიტროპოლიტის თქმით, შეთავაზება მათთვისაც მისაღებია და ისინი ლოცვას არავის უშლიან.

შეხვედრა სამხარეო ადმინისტრაციაში შედგა. მხარის გუბერნატორის თქმით, მათი შეკრების მთავარი მიზანი იყო კონსესუსამდე მისულიყვნენ, რის საფუძველზეც შედეგის მიღება მოხდება.

შეხვედრას ესწრებოდნენ რელიგიის საკითხთა სახელმწიფო სააგენტოს თავმჯდომარე ზაა ვაშაყმაძე, დასავლეთ საქართველოს მუფთი ბეგლარ ქამაშიძე, სამცხე–ჯავახეთის მუფთი მამუკა ვაშაყმაძე, ახალციხისა და ტაო–კლარჯეთის მიტროპოლიტი თეოდორე, ზარზმის მონასტრის წინამძღვარი მამა ნიკოლოზი, სამცხე–ჯავახეთის გუბერნატორი აკაკი მაჭუტაძე, ადიგენის მუნიციპალიტეტის გამგებელი ზაქარია ენდელაძე და სხვები.

რელიგიის საკითხთა სახელმწიფო სააგენტო მომდევნო შეხვედრას ახალციხეში 1 დეკემბერს გამართავს.

შეგახსენებთ, რომ მოხეში მდგომარეობა ხელახლა მას შემდეგ დაიძაბა, რაც მუსლიმმა მრევლმა სადავო შენობაში ლოცვა თვითნებურად გადაწყვიტა. ისინი განმარტავდნენ, რომ ლოცვის აღსრულებას ამ შენობაში საფუძვლად ორი მიზეზი დაედო. პირველი, რომ აქამდე არსებულ სალოცავში პირობები არ არის და მეორე, სადავო შენობის კუთვნილების შესახებ, ამ დრომდე  სპეციალურად შექმნილი კომისიის დასკვნა არ არსებობს.

თიკო კურტანიძე