აწყვიტაში მომხდარი მკვლელობის საქმეზე ბრალდებულს პატიმრობა შეეფარდა
11:36 / 21.09.2022
ასპინძის მუნიციპალიტეტის სოფელ აწყვიტაში მომხდარი მკვლელობის საქმეზე ბრალდებული ნაფიც მსაჯულთა სასამართლომ დამნაშავედ ცნო და 10 წლით პატიმრობა შეეფარდა. ინფორმაციას საქართველოს პროკურატურა ავრცელებს.
"პროკურატურის მიერ წარდგენილი მტკიცებულებების საფუძველზე, გორის ნაფიც მსაჯულთა სასამართლომ განზრახ მკვლელობაში ბრალდებული დამნაშავედ ცნო.
შინაგან საქმეთა სამინისტროს მირ ჩატარებული გამოძიების შედეგად და ბრალდების მხარის მიერ სასამართლო პროცესზე წარდგენილი მტკიცებულებებით დადასტურდა, რომ 2021 წლის 29 დეკემბერს, ასპინძის რაიონის სოფელ აწყვიტში, ბრალდებულმა, პირადი უთანხმოების საფუძველზე წარმოშობილი შელაპარაკების დროს, დაზარალებულს დანით ჭრილობა მიაყენა. მიყენებული დაზიანების შედეგად, დაზარალებული გარდაიცვალა.
ნაფიცი მსაჯულების მიერ გამოტანილი გამამტყუნებელი ვერდიქტის საფუძველზე, სასამართლომ ბრალდებული დამნაშავედ ცნო განზრახ მკვლელობაში და სასჯელის სახედ და ზომად 10 წლით თავისუფლების აღკვეთა შეუფარდა." - ნათქვამია განცხადებაში.
შეგახსენებთ, რომ შემთხვევა 2021 წლის 29 დეკემბერს, დაახლოებით 20:00 სთ-თვის მოხდა. შელაპარაკების ნიადაგზე გარდაცვლილია 46 წლის ვანო წითლანაძე.