სამცხე-ჯავახეთის სამხარეო
საკონსულტაციო საბჭოს მორიგი სხდომა ნინოწმინდის
მუნიციპალიტეტში გაიმართა. შეხვედრას მხარის
გუბერნატორი აკაკი მაჭუტაძე გაუძღვა.
საბჭოს სხდომაზე, მუნიციპალიტეტებში მიმდინარე წელს დაგეგმილი ინფრასტრუქტურული პროექტების, მათი სატენდერო პირობების, სამშენებლო სამუშაოების დაწყებისა და დასრულების ვადების შესახებ იმსჯელეს.
სამხარეო ადმინისტრაციის ინფორმაციით, რეგიონებში
განსახორციელებელი პროექტების ფონდიდან 2016 წელს სამცხე-ჯავახეთში 15
600 631 ლარის ღირებულების 38 პროექტი განხორციელდება. პრიორიტეტების მიხედვით ესენია: გზების
რეაბილიტაციის 30 პროექტი, რომლის ფარგლებშიც დაიგება 42 კილომეტრამდე
გზა; სასმელი წყლის სისტემების რეაბილიტაციის 3 ობიექტი, რომლის
საერთო სიგრძე 20,2 კილომეტრს შეადგენს; 2,9 კილომეტრი სიგრძის
საკანალიზაციო სისტემის რეაბილიტაციის პროექტი
ბაკურიანში;
გარდა ამისა, მიმდინარე წელს მხარის მუნიციპალიტეტებში დაგეგმილია მრავალბინიანი საცხოვრებელი კორპუსების ეზოების, ტროტუარების, სკვერისა და სტადიონის რეაბილიტაციის პროექტების განხორციელება.
სამუშაო შეხვედრაზე, განიხილეს ის პრობლემატური საკითხებიც, რომელთა გადაწყვეტა ადგილობრივი თვითმმართველობის ორგანოების კომპეტენციაში არ შედის და მათი მოგვარება ცენტრალური უწყებების ჩართვას საჭიროებს.
სამხარეო საკონსულტაციო საბჭოს სხდომას გუბერნატორთან ერთად, მუნიციპალიტეტების წარმომადგენლები დაესწრნენ.
