მაღალმთიანის სტატუსის მქონე დასახლებები სამცხე–ჯავახეთში და მასთან დაკავშირებული პრობლემები– სხვილისის მოსახლეობა სტატუსის მინიჭების გამო, სოფლის ორად გაყოფას აპროტესტებს.
სხვილისის მოსახლეობა სოფლის ორად გაყოფას აპროტესტებს. მაღალმთიანის სტატუსი ქვემო სხვილისს მიენიჭა, ზემო სხვილისი კი სტატუსისა და შესაბამისი შეღავათების გარეშე დარჩა. ადგილობრივებისთვის გაუგებარია, რა კრიტერიუმით გაიყო სოფელი.
ახალციხის გამგებლის მოადგილე ირწმუნება, რომ სოფელი ადმინისტრაციულად, ზემო და ქვემო ნაწილად არის გაყოფილი. თუმცა მაღალმთიანი დასახლებების ჩამონათვალში აღნიშნულია, რომ სტატუსი სოფელ სხვილისმა მიიღო. აქ ზემო და ქვემო სხვილისი არ არის მითითებული. გურამ მელიქიძის თქმით, ქვედა სხვილისს სტატუსი მიგრაციის მაჩვენებლის მიხედვით მიენიჭა, გამგებლის მოადგილე ამბობს, რომ საკითხი სამუშაო პროცეშია და არ არის გამორიცხული მაღალმთიანის სტატუსი ზემო სხვილისმაც მიიღოს.
სხვილისი ერთადერთი სოფელი არ არის, სადაც სტატუსის მინიჭებაზე დაობენ. ოპოზიციური პარტიის წარმომადგენლებს არაერთი მაგალითი მოჰყავთ, სადაც გაუგებარია, რა პრინციპით მოხვდა ესა თუ ის სოფელი მაღალმთიან დასახლებათა ნუსხაში. „მთავრობის კიდევ ერთი გაუაზრებელი ქმედება“–ასე აფასებს მაღალმთიანობის კანონს, „ახალი პოლიტიკური ცენტრი–გირჩის“ ახალციხის კოორდინატორი. სტატუსის მინიჭების პრინციპი გაუგებარია „გაერთიანებული დემოკრატიული მოძრაობის“ რეგიონული კოორდინატორისთვისაც.
საპარლამენტო უმცირესობის წევრმა და ახალციხის მაჟორიტარმა დეპუტატმა, თანაგუნდელებისაგან განსხვავებით, მაღალმთიანობის კანონს მხარი დაუჭირა. ვაჟა ჩიტაშვილი „მეცხრე არხთან“ საუბრისას ამბობს, რომ ხარვეზების მიუხედავად, კანონი მოსახლეობას დადებითად წაადგება. რაც შეეხება სხვილისის საკითხს, ვაჟა ჩიტაშვილი აპირებს, რომ აღნიშნული საკითხი პარლამენტშიც განიხილოს.
საქართველოს მთავრობამ, მაღალმთიან დასახლებათა ნუსხის დამტკიცების შესახებ დადგენილება 2015 წლის 30 დეკემბერს მიიღო, რომელიც 2016 წლის პირველი იანვრიდან ამოქმედდა. კანონის მიხედვით, მაღალმთიანად ითვლება ზღვის დონიდან 1500 მეტრის სიმაღლეზე ან ზემოთ მდებარე დასახლება. სადაც მთის ფერდობები დახრილია, ინფრასტრუქტურა არ არის შესაბამისი, რთულია კლიმატური პირობები, მცირეა სასოფლო–სამეურნეო დანიშნულების მიწა, გაუარესებულია დემოგრაფიული მდგომარეობა, და სხვა.
