ახალციხის ციხის ყოფილი თანამშრომელი გათავისუფლების გამო, ადმინისტრაციის წინააღმდეგ სამართლებრივად იბრძოლებს. სამცხე–ჯავახეთის ისტორიული მუზეუმის კურატორი ჯუნა ნათენაძე შესაბამის საჩივარს ამზადებს. მისი თქმით, ციხის თანამშრომელთა ნაწილისთვის შრომითი ხელშეკრულების შეწყვეტის შემდეგ, ადმინისტრაციაში ანაზღაურება გაეზარდათ, მათი გათავისუფლების მიზეზად კი ხელმძღვანელობამ არააქტიური ტურისტული სეზონი და შემოსავლების სიმწირე დაასახელა.
ჯუნა ნათენაძესა და მასთან ერთად ხელშეკრულების შეწყვეტის გამო გათავისუფლებულ თანამშრომლებს, დაგვიანებული გამოხმაურებისთვის, “ფეისბუქის” პირად გვერდზე ბოდიშს უხდის კომპლექსის საზოგადოებასთან ურთიერთობის სამსახურის უფროსი. ლილი გოზალიშვილი აღნიშნავს, რომ 9 ადამიანის გათავისუფლებისა და დარჩენილი პერსონალის ნაწილისთვის ხელფასის მომატების შემდეგ, გაჩუმება აღარ შეუძლია. მან განცხადება 7 იანვარს გაავრცელა და საზოგადოებას მეორე დღისთვის საკუთარი აზრის ხმამაღლა დაფიქსირებას დაპირდა. თუმცა 8 იანვარს მედიასთან კომენტარის გაკეთებისგან დროებით თავი შეიკავა.
ახალციხის ციხის დირექტორის მოვალეობის შემსრულებელის განმარტებით, ამ დროისათვის ხელშეკრულება ცხრა გიდსა და სამ მეთვალყურეს შეუწყდა. ილია სიდამონიძის თქმით, დაგეგმილი იყო კიდევ ოთხი მარეგულირებლის გათავისუფლება, თუმცა დაცვის პოლიციამ, რომელიც ციხის ზედა ნაწილს უწევს მეთვალყურეობას, ადმინისტრაციის შეთავაზებაზე – ციხის ქვედა ტერიტორიაც შეეთავსებინა, უარი განაცხადა. ამიტომ ოთხ მარეგულირებელს ხელშეკრულება ისევ გაუგრძელეს. რაც შეეეხება, თანამშრომლებისათვის ანაზღაურების დამატებას, ილია სიდამონიძის თქმით, ხელფასები გათავისუფლებული კოლეგების ხარჯზე არ გაუზრდია, რადგან ამ შემთხვევაში თანამდებობების მიხედვით ანაზღაურების გათანაბრება მოხდა.
ილია სიდამონიძე ირწმუნება, რომ თანამშრომელთათვის ხელშეკრულების შეწყვეტა ზამთრის არააქტიური სეზონის გამო მოხდა. აღნიშნულს ადასტურებს ციხის ტურიზმის სამსახურის უფროსიც. გიორგი ჩერქეზიშვილის თქმით, არააქტიურ სეზონზე კომპლექსს ერთი თვის განმავლობაში 2 000–მდე ვიზიტორი სტუმრობს, მაშინ როდესაც ივლისის თვეში ტურისტთა რაოდენობა დაახლოებით, 20 000–ს აღწევს.
ახალციხის ციხის 16 თანამშრომელი რომ ახალ წელს უმუშევარი შეხვდებოდა, ამის შესახებ, ციხის ადმინისტრაციამ ცხრა გიდს, სამ მეთვალყურესა და ოთხ მარეგულირებელს ოფიციალურად 29 დეკემბერს, თათბირზე განუცხადა. თუმცა აქედან, შრომითი ხელშეკრულება ოთხ მარეგულირებელს ისევ გაუგრძელდა. ციხის ადმინისტრაცია, აპრილის თვიდან, დათხოვილი თანამშრომლების ხელშეკრულებით აყვანას გეგმავს, თუ მათ ამის სურვილი ისევ ექნებათ. ეს არ ეხებათ, მუზეუმის ყოფილ კურატორებს, რომლებიც ასევე, ციხის ბალანსზე ირიცხებოდნენ. ადმინისტრაცია მათ სამსახურში მიღებას აღარ აპირებს.
