საქართველოს პრეზიდენტი ახალციხეში სამცხე-ჯავახეთის სახელმწიფო უნივერსიტეტის სტუდენტებს შეხვდა. გიორგი მარგველაშვილი ახალგაზრდებს მიესალმა და სიტყვით გამოსვლა 8 ოქტომბრის საპარლამენტო არჩევნებით დაიწყო.
მან ხმის მიცემის აუცილებლობაზე ისაუბრა და სტუდენტებს საკუთარი პოზიციის დაფიქსირებისკენ მოუწოდა.
“არჩევნებში მონაწილეობას თუ არ მივიღებთ, რომელიმე პოლიტიკოსს კი არ დავსჯით, არამედ დავსჯით საკუთარ თავს და სამშობლოს” – განაცხადა პრეზიდენტმა.
გიორგი მარგველაშვილს სამცხე–ჯავახეთის სახელმწიფო უნივერსიტეტში რექტორმა უმასპინძლა. მერაბ ბერიძემ პრეზიდენტს ის სირთულეები გაიცნო, რომლის წინაშეც სასწავლებელი ფუნქციონირების ბოლო წლებში დადგა. სასწავლებლის რექტორმა ყურადღება სტუდენტურ საცხოვრებელზე გაამახვილა და ყოფილი სამხედრო შენობების ამ მიზნით რეაბილიტაციის საკითხი დააყენა.
გიორგი მარგველაშვილმა სიტყვით გამოსვლის დასრულების შემდეგ კამპანიის „შენი ხმა ჩვენი მომავალია“ გამარჯვებულები წარადგინა. კამპანიაში ქვეყნის მასშტაბით, პირველი ადგილი ახალციხის მეექვსე საჯარო სკოლის მოსწავლეებმა მოიპოვეს, რომლის ფარგლებშიც ისინი ხუთი დღით რომში გაემგზავრებიან
საქართველოს პრეზიდენტთან შეხვედრის მეორე ნაწილში სტუდენტებს საშუალება მიეცათ გიორგი მარგველაშვილისთვის კითხვები დაესვათ. ახალგაზრდები საქართველოს ევროკავშირთან ასოცირების საკითხით, ეთნიკური უმცირესობების საარჩევნო პროცესებში ჩართულობითა და ინფორმირებით, ასევე ხმის მიცემისას სასურველი პარტიისა და კანდიდატის შერჩევის კრიტერიუმებით დაინტერესდნენ.
საქართველოს პრეზიდენტი ამომრჩეველთა გააქტიურების კამპანიის ფარგლებში ქვეყნის რეგიონებში შეხვედრებს ორი თვის განმავლობაში მართავდა. გიორგი მარგველაშვილი სტუდენტებს ბოლოს სწორედ სამცხე–ჯავახეთის სახელმწიფო უნივერსიტეტში შეხვდა.
საქართველოს პრეზიდენტთან შეხვედრა სასწავლებლის ეზოში გაიმართა. გიორგი მარგველაშვილის მოსასმენად უნივერსიტეტის სტუდენტები და პროფესორ–მასწავლებლები შეიკრიბნენ.
ავტორები: თიკო კურტანიძე, რამაზ ალავიძე