„სახელმწიფო ხალხისთვის“ ლიდერი ახალციხეში ადგილობრივ მოსახლეობას შეხვდა. პაატა ბურჭულაძემ ცენტრალური პარკის ტერიტორიაზე შეკრებილ მხარდამჭერებს პარტიის წარმომადგენლებთან ერთად, საარჩევნო პროგრამა გააცნო.
პენსია 250 ლარი, ბიზნეს გადასახადების შემცირება, მიწის გამარტივებული რეგისტრაცია, სამი მილიარდი დოლარის ინვესტიცია და სხვა – ეს იმ დაპირებების არასრული ჩამონათვალია, რომელიც შეხვედრაზე პარტიის წარმომადგენლებმა გააჟღერეს.
პაატა ბურჭულაძემ საარჩევნო პროგრამის გაცნობის შემდეგ, შეკრებილ მოსახლეობას ახალციხე–ადიგენის გარერთიანებული ოლქის მაჟორიტარობის კანდიდატი კობა გორგოძე და ახალციხის მერიბის კანდიდატი ივანე გვარამაძე ოფიციალურად წარუდგინა.
მხარდამჭერების თქმით, მთავრობაში მოსულმა ძალამ მთავარია ხალხის გასაჭირი დაინახოს და პრობლემების მოგვარებაზე იზრუნოს.
„პაატა ბურჭულაძე – სახელმწიფო ხალხისთვის“ლიდერი ახალციხის გარდა, ამომრჩეველს ბორჯომში, ასპინძასა და ახალქალაქშიც შეხვდა. მან მხარდამჭერებს მაჟორიტარობის კანდიდატები წარუდგინა.
ავტორები: თიკო კურტანიძე, ნანა ინასარიძე
