ათასწლეულის გამოწვევის ფონდმა, ახალციხის პირველი საჯარო სკოლის მშენებელი კომპანიის მიმართ, ხელშეკრულებით გათვალისწინებული სანქციები აამოქმედა. ,,ინტერ პლიუსმა” შენობის რეაბილიტაცია განსაზღვრულ ვადებში ვერ დაასრულა.
ფონდში ამბობენ, რომ ამის გამო, ყოველდღიურად 500 დოლარის ოდენობის ჯარიმა, კომპანიას პირველი დეკემბრიდან ერიცხება. ფონდის საზოგადოებასთან ურთიერთობის სამსახურის დირექტორის თქმით, სამშენებლო სამუშაოები წლის ბოლომდე დასრულდება, თუმცა კომპანიის დაჯარიმება ამით არ შეჩერდება.
ათასწლეულის გამოწვევის ფონდსა და სამშენებლო კომპანია ,,ინტერ პლიუსს” შორის გაფორმებულ კონტრაქტში, ახალციხის პირველი საჯარო სკოლის გარდა, ნინოწმინდის მუნიციპალიტეტის სოფელ განძისა და ახალქალაქის სოფელ კარტიკამის სკოლების რეაბილიტაციაც შედის. ფონდში ამბობენ, რომ ყველაზე მეტი სამუშაო, კარტიკამის საჯარო სკოლაშია დარჩენილი, სადაც კლიმატური პირობების გამო, სამუშაოები შეჩერებულია. ,,ინტერ პლიუსს” ჯარიმები ყოველდღიურად, სამივე ობიექტის დასრულებამდე დაეკისრება.
რუსუდან გვარამაძე