,,საერთაშორისო გამჭვირვალობა – საქართველო“-მ კვლევის შედეგები გამოაქვეყნა, რომლის მიხედვითაც საქართველოს 27 მუნიციპალიტეტში შრომის ანაზღაურების ხარჯები კანონით განსაზღვრულ ოდენობაზე მეტია. 27–დან ხუთი, სამცხე–ჯავახეთის მუნიციპალიტეტია. არასამთავრობო ორგანიზაციის მონაცემების მიხედვით, კანონს ახალქალაქის, ნინოწმინდის, ადიგენის, ასპინძისა და ახალციხის თემის მუნიციპალიტეტები არღვევენ.
,,საერთაშორისო გამჭვირვალობა საქართველოს“ ინფორმაციით, ახალციხის თემში შრომის ანაზღაურებაზე გათვალისწინებული თანხა, საბიუჯეტო ხარჯების 31.52 % შეადგენს. კვლევის შედეგებს არ ეთანხმებიან მუნიციპალიტეტის გამგეობაში. გელა ლომიძე ირწმუნება, რომ არასამთავრობო ორგანიზაციამ მონაცემები არასწორად დაითვალა.
,,საერთაშორისო გამჭვირვალობა საქართველოს“ მიერ გავრცელებული ინფორმაცია არ უკვირთ ,,ერთიან ნაციონალურ მოძრაობაში.“ მაკა სუდაძე კვლევის შედეგებში მაღალი პროცენტის მიზეზად, ხელოვნურად გაზრდილ შტატებს ასახელებს.
კვლევის მიხედვით, ახალქალაქის მუნიციპალიტეტში შრომის ანაზღაურებაზე გათვალისწინებული თანხა, საბიუჯეტო ხარჯების 27 % შეადგენს. ნინოწმინდის 33 %–მდე, ასპინძის მუნიციპალიტეტის – 32 %, ადიგენის – 31 პროცენტზე მეტს. კვლევის შედეგებს აპროტესტებენ ადიგენის მუნიციპალიტეტის გამგეობაში. ციფრებზე შენიშვნები აქვს ასპინძის თვითმმართველობასაც.
მოსახლეობის დიდ ნაწილს არ აქვს დეტალური ინფორმაცია, რას შეადგენს თვითმმართველობის თანამშრომელთა შრომის ანაზღაურება. თუმცა ადგილობრივების უკმაყოფილების მიზეზი, თანამდებობის პირთა ხელფასების და პრემიების რაოდენობაა.
საჯარო მოსამსახურეთა შრომის ანაზღაურებას ადგილობრივი თვითმმართველობის კოდექსი არეგულირებს. 156-ე მუხლის მე-3 ქვეპუნქტის თანახმად, “გამგეობის/მერიის და საკრებულოს აპარატის საჯარო მოსამსახურეთა შრომის ანაზღაურების ხარჯები არ უნდა აღემატებოდეს მუნიციპალიტეტის ბიუჯეტით გათვალისწინებული ხარჯების 25 პროცენტს.“
