ახალციხის მერიაში საჯარო მოხელეები გადამზადდებიან. ამისათვის ადგილობრივი ბიუჯეტიდან 24 000 ლარი გამოიყო. სასწავლო ცენტრი, რომელიც მერიის თანამშრომლებს კონკრეტული მიმართულებებით გადაამზადებს, ელექტრონული შესყიდვების გზით შეირჩევა– აღნიშნული საკითხი დღეს მერიის საკრებულოს სხდომაზე ერთ–ერთი მნიშვნელოვანი იყო.
ქალაქ ახალციხის მერიასა და საკრებულოში დასაქმებული 72 საჯარო მოხელე 2016 წლისათვის გადამზადებას გაივლის– სასწავლო კურსის გეგმა დღეს საკრებულოს სხდომაზე დამტკიცდა. იგი 6 მიმართულებას მოიცავს: ადგილობრივი თვითმმართველობის სამართლებრივი რეგულირება, ბიუჯეტის ფორმირება, მუნციპალური ქონების მართვა და განკარგვა, ადმინისტრაციული წარმოება, მშენებლობის ნებართვის გაცემა და ზედამხედველობის განხორციელება, ასევე მოქალაქეთა ეფექტური მომსახურების ტექნოლოგიების შესწავლა. აღნიშნული კურსებისათვის მერია 24 000 ლარს გამოყოფს.
როგორც ადამიანური რესურსების მართვის განყოფილების უფროსმა განმარტა, თანამშრომელთა გადამზადება ადგილობრივი თვითმმართველობის კოდექსის 101–ე მუხლში შეტანილმა ცვლილებებმა განაპირობა. სიახლის მიხედვით, ყველა მუნიციპალიტეტი ვალდებულია გადამზადებისათვის ფინანსები ადგილობრივი ბიუჯეტიდან გამოყოს, თანხა მოხელეების შრომითი ანაზღაურების არანაკლებ 1% –ით განისაზღვრება.
საჯარო მოხელეთა გადამზადებასა და სასწავლო გეგმის დამტკიცების შესახებ საკითხს მხარი არ დაუჭირა გაერთიანებული დემოკრატიული მოძრაობის წევრმა. ჯიმშერ გოგოლაური მიიჩნევს, რომ კურსი მცირეხნიანია და ეფექტური არ იქნება. მისივე თქმით, უმჯობესია, თუკი აღნიშნული თანხა სხვა მიმართულებით დაიხარჯება.
დღევანდელ საკრებულოს სხოდმაზე კიდევ ერთ მნიშვნელოვან საკითხს, ქალაქ ახალციხის საკუთრებაში არსებული მიწის ნაკვეთების იჯარის წესით გადაცემა წარმოადგენდა. დეპუტატთა გადაწყვეტილებით, შპს ,,ველაჯიოს“, იგივე სასტუმრო ,,ლომსიას“ იჯარით გადაეცა ღია კაფისათვის გამოყოფილი ადგილი, რომელშიც იგი ყოველთვიურად 200 ლარს გადაიხდის. იმავე წესით ისარგებლებს შპს „ფოსტა“, იგი ქალაქის 3 ადგილას განთავსებულ ჯიხურში მერიას 150 ლარს გამოუყოფს, ასევე იჯარით, თვეში 40 ლარად გადაეცემა ტერიტორია ცენტრალურ პარკში ბატუტის დამონტაჟებისთვის ფიზიკურ პირს, ალექსი მაისურაძეს.
დღევანდელ საკრებულოს სხოდმას 15–დან დეპუტატიდან 11 მათგანი დაესწრო, მათ 7 საკითხი განიხილეს. სხდომის ბოლოს საკრებულოს წევრები მესამე კვარტლის ანგარიშს ზედაპირულად გაეცნენ, რომლის მიხედვითაც ბიუჯეტის საშემოსავლო ნაწილი 96%–ით, ხარჯვთი ნაწილი კი 67 %–ით შესრულდა. 9 თვის ბიეუჯეტის შესრულებასთან დაკავშირებით, დეპუტატებს საკუთარი აზრი არ დაუფიქსირებიათ.
