ახალციხის დემოკრატიული ჩართულობის ცენტრში „სამცხე-ჯავახეთის სამხარეო განვითარების პროგრამის“ ფარგლებში რეგიონული დებატები გაიმართა. ახალციხისა და ადიგენის მუნიციპალიტეტების 3 სასკოლო კლუბი პირველობის მოსაპოვებლად სამი დღის განმავლობაში იბრძოდა. რეგიონის მასშტაბით, გამარჯვება მოხის სასკოლო კლუბმა მოიპოვა, რომელიც საირმეში, ეროვნულ დებატებში მონაწილეობის მისაღებად გაემგზავრება.
„გენდერული თანასწორობა გამართლებულია“ – ამ თემაზე ახალციხეში საჯარო დებატები გაიმართა. საერთაშორისო ორგანიზაცია „ვოლდ ვიჟენის“ ათი სასკოლო გუნდიდან რეგიონულ ფინალში ერთმანეთს ურავლისა და მოხის სკოლების მოსწავლეები შეხვდნენ. ერთმა გუნდმა სადებატო თემა მტკიცებით ფორმაში წარადგინა, ხოლო მეორემ უარყოფითში. საკუთარი მოსაზრებების დაფიქსირების შემდეგ თითოეული გუნდი სპეციალურმა ჟიურიმ შეაფასა და გამარჯვებულიც გამოავლინა. რეგიონის მასშტაბით ფინალისტი და ეროვნული დებატების საგზურის მფლობელი მოხეს სასკოლო კლუბის გუნდი გახდა.
გამარჯვებული გუნდის გარდა ორგანიზატორებმა საუკეთესო მოდებატეებიც გამოავლინეს, რომლებიც ფინალისტებთან ერთად სამცხე–ჯავახეთის რეგიონს საირმეში, ეროვნულ დებატებზე წარადგენენ. 12 საუკეთესო მონაწილე, გამარჯვების მოპოვებას 21 და 22 მარტს, საქართველოს მასშტაბით შეეცდება. რეგიონული დებატების მონაწილეები ფიქრობენ, რომ მსგავსი აქტივობები ახალგაზრდებს სხვადასხვა უნარ–ჩვევის ჩამოყალიბებაში ხელს მნიშვნელოვნად უწყობს.
რეგიონული დებატების ფინალი ახალციხეში სამი დღის განმავლობაში მიმდინარეობდა. მასში სამი საჯარო სკოლის 30 მონაწილე იყო ჩართული. მათგან ფინალში სამ–სამი წევრით დაკომპლექტებული გუნდები გავიდნენ. ორგანიზატორების განმარტებით, ორივე გუნდი ძლიერი იყო და ისინი ბოლო წუთებამდე თანაბარი შესაძლებლობებით სარგებლობდნენ. ეროვნულ დებატებში მონაწილეობის მისაღებად სამცხე–ჯავახეთის წარმომადგენლებს, საერთაშორისო ორგანიზაცია „ვოლდ ვიჟენი“ სრულად დააფინანსებს
ორგანიზატორთა თქმით, თემა რომელზეც სასკოლო კლუბებმა 3 დღის განმავლობაში იმსჯელეს, აქტუალობიდან გამომდინარე შეირჩა. საჯარო დებატები რეგიონის მასშტაბით, „სამცხე-ჯავახეთის სამხარეო განვითარების პროგრამისა“ და „საქართველოს დებატებისა და განათლების ინსტიტუტის“ ორგანიზებით გაიმართა.
