ახალციხის ციხეში აქტიური ტურისტული სეზონი იწყება,  ციხის დირექტორის პოსტი კი ისევ ვაკანტურია.  თუმცა დანიშნულია  ისტორიული კომპლექსის დირექტორის მოადგილე.

ახალციხის ციხის დირექტორის პოზიცია ისევ ვაკანტურია. ამ დრომდე ადგილობრივი ხელისუფლების მიერ სასურველი კანდიდატურა ვერ შეირჩა. მიუხედავად ამისა,  ისტორიული კომპლქსის დირექტორის მოადგილე უკვე დანიშნულია.  ნათია ხუციშვილის განმარტებით, ამასთან დაკავშირებით, გადაწყვეტილება თავად მერმა მიიღო, ამასთანავე გაუქმდა მრჩევლების პოსტი. მისივე თქმით, ციხის დირექტორის დანიშვნისთანავე, ადმინისტრაცია მუშაობას ახალი შემართებით დაიწყებს.

ახალციხის ციხე, რომ ქალაქის სავიზიტო ბარათია და  სწორი მენეჯმენტი სჭირდება ამას ადგილობრივი არასამთავრობო ორგანიზაციების წარმომადგენლებიც ამბობენ. ასოციაცია „ტოლერანტი“–ს ხელმძღვანელისა და ისტორიის დოქტორის ცირა მესხიშვილის აზრით, პირველ რიგში მუზეუმი  დამოუკიდებელი ერთეული უნდა გახდეს და ბიუჯეტიდან ნაწილობრივ  დაფინანსდეს. მისივე თქმით ციხის ადმინისტრაციამ  უნდა შეიმუშაოს ბიზნესის განვითარების კონცეფცია და დაიწყოს ახალი კონტაქტების მოძიება მეზობელ ქვეყნებში.

ასოციაცია ტოლერანტის თავმჯდომარის მსგავსად ფიქრობს „დემოკრატ–მესხთა კავშირის“  წევრი.  ჯაბა ნათენაძის აზრით, ციხის ადმინისტრაცია პიარის კუთხით ნაკლებად მუშაობს, ამიტომ მათ საქმიანობა ამ მიმართულებით უნდა გააუმჯობესონ. მისივე თქმით,  ციხის დირექტორის პოზიცია თვეების განმავლობაში ვაკანტური არ უნდა იყოს და ადგილობრივი ხელისუფლების წარმომადგენლებმა გადაწყვეტილება დაუყოვნებლივ უნდა მიიღონ.

რაბათის ისტორიული კომპლექსი 2012 წლის აგვისტოს თვეში გაიხსნა. სტატისტიკური მონაცემების თანახმად, პირველ წელს ტერიტოირიას 83 955 დამთვალიერებელი ესტუმრა – ხოლო ბიუჯეტში 242 190 ლარი შევიდა

2013 წელს ციხე   132 072 ადამიანმა მოინახულა.  ციხის შემოსავალმა კი  498 999 ლარი შეადგინა.

2014 წლის მონაცემებით,  ისტორიულ კომპლექსში ვიზიტორთა რაოდენობა შემცირდა.  ციხით 117 548 ადამიანი დაინტერესდა,  ხოლო ბიუჯეტში 469 509 ლარი შევიდა.

იმდინარე წლის ორი თვის მონაცემებით კი კომპლექსს 2 813 ვიზიტორი ჰყავდა.

ვიზიტორთა რაოდენობის მიხედვით, პირველი  ქვეყნის ხუთეული ასე გამოიყურება:

2014 წელი

1. პოლონეთი – 3 786 ადამიანი;

2. ისრაელი – 3 433;   

3. რუსეთის ფედერაცია–1269;

4. თურქეთი–809;

5. უკრაინა–753;

როდის დაინიშნება ახალციხის ციხის დირექტორი და რა გეგმავს ადგილობრივი ხელისუფლება ისტორიულ კომპლექსთან დაკავშირებით,  უცნობია. ევროპასთან ასოცირების დოკუმენტზე, ხელის მოწერის  შემდეგ კი ტურიზმის განვითარების კუთხით, საქართველომ  გარკვეული ვალდებულებები აიღო, რომლის შესრულება ქვეყანას აუცილებლად მოუწევს.  რა როლი დაეკისრება ახალციხის ციხეს მიმდინარე პროცესებში –  ამას მომავალი გვიჩვენებს.