Ի պատասխան միջազգային պատժամիջոցների և կարգավորող պահանջների՝ «TBC Bank»-ը վերջերս հայտարարեց արտարժույթով գործարքների կարգավորման քաղաքականության մեջ էական փոփոխությունների մասին։ Այս մասին բանկի ծանուցումն ուղարկվել է օգտատերերին։

Ինչպես նշվում է բանկի հրապարակած տեղեկատվության մեջ, այս փոփոխություններն ուղղված են ՄԱԿ-ի, Միացյալ Թագավորության, ԱՄՆ-ի և Եվրամիության կողմից սահմանված պատժամիջոցների ռեժիմներին համապատասխանության ապահովմանը։

«Հիմնական թարմացումներից մեկը վերաբերում է Ռուսաստանի Դաշնության հետ կապված գործարքներին: ԱՄՆ ֆինանսների նախարարության արտաքին ակտիվների վերահսկման գրասենյակի (OFAC) վերջին գործադիր հրամանից հետո TBC բանկը խստացնում է իր պահանջները նման գործարքների համար:Սա ենթադրում է լրացուցիչ փաստաթղթերի անհրաժեշտություն, ինչպիսիք են՝ ապրանքագրերը, պայմանագրերը և ապրանքների ծագման վկայականները: Նշենք, որ պատժամիջոցների ենթարկված անձանց կամ ռուսական ռազմաարդյունաբերական բազայի կողմնակիցների մասնակցությամբ գործարքները խստիվ արգելվում են։

Ավելին, TBC բանկի ներքին քաղաքականությունն արգելում է ուղղակի կամ անուղղակի գործարքները պատժամիջոցների տակ գտնվող երկրների, այդ թվում՝ Իրանի Իսլամական Հանրապետության հետ։

Արտագնա անդրսահմանային վճարումների համար «TBS Bank»-ը երկրները բաժանել է երեք խմբի՝ ըստ ռիսկի գործոնների. Կախված նշանակման երկրից, հաճախորդից կարող է պահանջվել ներկայացնել հատուկ փաստաթղթեր: Այս պահանջներին չհամապատասխանելը կարող է հանգեցնել գործարքի կասեցման կամ չեղարկման:

Պահանջվող փաստաթղթերը չտրամադրելը կարող է հանգեցնել ուղարկողին գումարի վերադարձի կամ հաշվի փակման»,- ասվում է բանկի հաղորդագրության մեջ: