Այն պնդումը, որ երիտասարդների մոտ կորոնավիրուսային հիվանդությունն ավելի թեթև է անցնում, այժմ արդեն միանշանակ չի ընդունվում Ռուսաստանում։ Մոսկվայում աշխատող ռեանիմատոլոգը պատմել է, որ իրենց բաժին հասնում են նաև երիտասարդ պացիենտներ։ Փոխանցում է Vesti.ru-ն։

Բժիշկը պատմել է, որ իրենց մոտ վերջին շրջանում ավելի շատ են հայտնվում 20, 30, 40 տարեկան վարակակիրներ։ Ընդ որում՝ հիմա արդեն հակված են կարծելու, որ բարդությունները ոչ այնքան տարիքային են, որքան առողջական վիճակով պայմանավորված։

Բարդացումները, ըստ ռեանիմատոլոգի, ավելի հաճախ լինում են 100 կգ-ից բարձր քաշով հիվանդների մոտ՝ ավելորդ քաշով պայմանավորված։ Բարդացմանը նպաստում են նաև արդեն հայտնի ուղեկցող հիվանդությունները՝ շաքարային դիաբետն ու սիրտ-անոթային համակարգի քրոնիկական հիվանդությունները։

Մեկ օրվա ընթացքում Ռուսաստանում հաստատվել է կորոնավիրուսի 7933 նոր դեպք։ Այդ մասին հայտարարել է Կորոնավիրուսի դեմ պայքարի օպերատիվ շտաբը։ Նոր դեպքերի մեծ մասը հայտնաբերվել է Մոսկվայում, որտեղ նոր վարակակիրների թիվը 3561 է։ Օպերատիվ շտաբում նշել են, որ մեկ օրվա ընթացքում ապաքինվել է 1601 պացիենտ, մահացել՝ 96-ը։

Ընդհանուր առմամբ Ռուսաստանում կորոնավիրուսով վարակակիրների թիվը հասել է 114 431-ի, ապաքինվածների թիվը՝ 13 220-ի, իսկ մահացածների թիվը՝ 1169-ի։ Նախօրեին Ռուսաստանում կորոնավիրուսով վարակակիրների թիվը հատել էր 100 000-ը։ Օպերատիվ շտաբի տվյալներով՝ ապրիլի 29-ին գրանցվել էր կորոնավիրուսի 7099 դեպք, ինչը 1258-ով ավելին էր, քան ապրիլի 28-ին։

Վարակվածների մեծ մասը նախկինի պես բաժին է հասնում Մոսկվային։ Քաղաքապետ Սերգեյ Սոբյանինը ապրիլի 30-ին չի բացառել, որ մայրաքաղաքը հասել է հիվանդության գագաթնակետին։ Ընդ որում նա նշել է, որ Մոսկվան չի անցել կորոնավիրուսի հաղթահարման ճանապարհի կեսը։ Ավելին, նա նշել է, որ անցել են ճանապարհի միայն 25 %-ը։ Սոբյանինի խոսքերով՝ հաշվի առնելով հիվանդության դինամիկան, վերջին 5-7 օրերին Մոսկվայում իրավիճակը կայունացել է։ Ըստ նրա՝ ներկայումս Մոսկվայում հիվանդության և մահացության ցուցանիշների աճը կազմում է մոտ 70 %:

Քաղաքապետը նշել է, որ Մոսկվայի հիվանդանոցներում ներկայումս գտնվում է կորոնավիրուսով շուրջ 17 000 պացիենտներ, որոնց մոտ հիվանդությունն ունի ծանր կամ միջին ընթացք։ Ավելի վաղ պարզ էր դարձել, որ կորոնավիրուս է հայտնաբերվել նաև ՌԴ վարչապետ Միխայիլ Միշուստինի մոտ։ Այդ մասին նա տեսակապով հայտնել է նախագահ Վլադիմիր Պուտինին։ Վարչապետի պարտականությունների ժամանակավոր իրականացումը դրվել է առաջին փոխվարչապետ Անդրեյ Բելոուսովի վրա։

Ապրիլի 29-ին ՌԴ պաշտպանության նախարարությունը հայտնել է, որ կորոնավիրուսով հիվանդ են ՌԴ ռազմական ուսումնական հաստատությունների շուրջ 1100 կուրսանտներ և ունկնդիրներ։ Նրանցից 413-ը բուժում են ստանում նախարարության զինվորական հոսպիտալներում, 600-ը գտնվում են ծառայության վայրի մեկուսարաններում, ևս 114-ը գտնվում են իրենց տներում, որտեղ և ինքնամեկուսացել են։