ՊՇՌ թեստի բացասական արդյունքը և պատվաստման կանաչ անձնագիրը հավասարապես կգործեն որպես սահմանի հատման պահանջ։ Այսօր գործադիրը հավանություն տվեց այս որոշման նախագծին։ Այլ կերպ ասած՝ այն քաղաքացիները, ովքեր կունենան պատվաստումները հավաստող կանաչ անձնագիր, այսուհետ Հայաստան գալու համար լրացուցիչ բացասական թեստի կարիք չեն ունենա։Azatutyun.am

Վարչապետի պաշտոնակատար Նիկոլ Փաշինյանն էլ կրկին զգուշացրեց՝ ինչ-որ պահի երկրները թույլ չեն տա չպատվաստված քաղաքացիների մուտքը իրենց տարածք. «Ասենք` օգոստոսից, սեպտեմբերից արդեն կարող են հայտնվել այդպիսի երկրներ: Ինչո՞ւ է սա կարևոր հիմա արձանագրել և անընդհատ իրազեկել մեր քաղաքացիներին, որովհետև պատվաստման գործընթացը չի իրականացվում մեկ ներարկումով: Պատվաստման գործընթացն իրականացվում է երկու ներարկումով, և սովորաբար կարող է ներարկումների միջև այդ ժամկետը տևել 2 ամիս»։

Պատվաստումների գործընթացը ներդնելուն զուգընթաց փորձ է արվում թեթևացնել կարանտինի մասին որոշման կետերը, ասաց առողջապահության նախարարի պաշտոնակատար Անահիտ Ավանեսյանը, իսկ հաջորդ փոփոխությունը մինչև 1 տարեկան երեխաներին է վերաբերում. «Մինչև 1 տարեկան երեխաներին երկիր մուտք գործելուց ՊՇՌ թեստավորման պահանջը հանել ենք, քանի որ եթե ընտանիքի անդամների մոտ բացասական է արդյունքը, ուրեմն շատ մեծ է հավանականությունը, որ մինչև մեկ տարեկան երեխան այլոց հետ չի շփվում, և ևս բացասական կլինի նրա թեստի արդյունքը»։

Ամենաճգնաժամային օրերին Հայաստանում օրական գրանցվել է 2000 և ավելի դեպք, բայց այսօր կորոնավիրուսի 3-րդ ալիքը կայունացման միտումներ է ցույց տալիս, արձանագրեցին գործադիրի անդամները։ Այսօր հաստատված դրական դեպքերի թիվը 425 է, ինչը վերջին 10 օրվա կտրվածքով փաստում է նվազման միտումը։ Հայաստանը պետք է արագ համալրի կանաչ երկրների շարքը, նշեց վարչապետի պաշտոնակատարը` այս հարցում մեծապես կարևորելով պատվաստումների իրականացումը. «Պետք է արձանագրել, որ մեր զբոսաշրջային ոլորտը վերականգնման շատ թույլ նախանշաններ է ցույց տալիս: Հիմա հոսքերի վերաուղղորդում է տեղի ունենում, և զբոսաշրջային հոսքերն ուղղվում են դեպի այն երկրներ, որտեղ բնակչության պատվաստման առավել բարձր մակարդակ կա»։

Այս պահին արդեն Հայաստանում պատվաստվել է 7000-ից ավելի քաղաքացի կամ բնակչության 0.24 տոկոսը։ Պատվաստումներն իրականացվում են անվճար՝ ցանկացած պոլիկլինիկայում, իսկ երեկվանից նաև մայրաքաղաքի տարբեր վայրերում տեղակայված շրջիկ կայաններում։ 18-54 տարեկան թիրախային խմբերն և խրոնիկ հիվանդություն ունեցողները պատվաստվում են ռուսական «Սպուտնիկ Վ»-ով, իսկ մյուս բոլոր քաղաքացիները՝ բրիտանաշվեդական «ԱստրաԶենեկա»-ով։ Մոտ օրերս արդեն հասանելի կլինի նաև չինական «Կորոնավակ»-ը։ Կառավարության անդամների մի մասն արդեն պատվաստվել է Հայաստանում հասանելի երկու վակցինաներով, փոխվարչապետ Տիգրան Ավինյանն, օրինակ «ԱստրաԶենեկա»-ով է պատվաստվել ու գոհ է։

«Եվս մեկ անգամ կոչ ենք անում մեր քաղաքացիներին պատվաստվել, որովհետև դա է այն միջոցը, որով աշխարհը վերջնականապես ցտեսություն է ասելու այս հիվանդությանը, և հետևապես մենք մեր օրինակով նաև ցույց ենք տվել, որ դեռևս ողջ են քպատվաստվելուց հետո, և որևէ վտանգ չկա», - ասում է Ավինյանը։

Պատվաստումները խթանելու նպատակով, չի բացառվում, որ առաջիկայում թողարկվեն հատուկ տարբերանշաններ, որոնք կփակցվեն այն տաքսիների, սպասարկման ոլորտի օբյեկտների կամ հյուրանոցների վրա, որտեղ աշխատակիցները պատվաստված կլինեն։ Սա թույլ կտա զբոսաշրջիկներին առանց մտավախության օգտվել նրանց ծառայությունից։ Եթե պատվաստումներին զուգահեռ խստիվ պահպանվեն նաև հակահամաճարակային կանոնները, ապա այս համավարակի վերջը կերևա, նկատում է Փաշինյանը. «Դիմակների գները եկել, հասել են նախահամաճարակային մակարդակի, ուստի շատ կարևոր է, որ մենք դիմակների կրման կանոնները հստակ պահպանենք: Ոստիկանության հետ պետք է քննարկենք հարցը, թե ինչպես կանոնների պահպանման նկատմամբ հսկողությունը ուժեղացնենք, որպեսզի այս պատուհանն օգտագործենք»։

Որ զգոնության պահպանումը կարևոր է նաև հաջորդ ալիքները կանխելու համար, նաև առողջապահության նախարարի պաշտոնակատարն է ընդգծում, արձանագրելով, որ ամեն հաջորդ ալիքի հետ վարակի և՛ երիտասարդացումը, և՛ հիվանդության ծանրությունը մեծացել է։