Ախալքալաքի Բորիս Լոմսաձեի անվան փողոցում քամին պոկել է գարեջրի գործարանի պահեստի տանիքը ՝ վնասելով գազատարը: Այս փողոցում գազամատակարարումը դադարեցվել է, տարվում են վերականգնման աշխատանքներ:

Արդեն մի քանի ժամ է, ինչ Ախալքալաքում մոլեգին քամի է: Պարբերաբար ուժեղ քամիները ինչ-որ բան են վնասում: Jnews- ը ստացել է տանիքների հերձաքարերի (շիֆեր) պոկված կտորների բազմաթիվ լուսանկարներ:

Քամին վնասել է գարեջրի գործարանի պահեստի ծածկը՝ ոչ հեռու Ախալքալաքի թիվ 4 դպրոցից, զինվորական հաշվառման ծառայության և Հանրային առողջության կենտրոնի դիմաց: Քամին տանիքի ծածկը պոկելուց հետո վնասել է նաև գազատարը: Վթարը վերացնելու ուղղությամբ տեղում շարունակվում են աշխատանքներ: Գազաբաշխիչ «SJGC» ընկերությունը հաղորդում է, որ գազամատակարարումը դադարեցվել է միայն Լոմսաձե փողոցում, իսկ վթարի վերացումը բավականին ծավալուն աշխատանք է: Աշխատողները՝ գազամատակարարումը վերականգնելու նպատակով, փորձում են վթարը վերացնելու աշխատանքներն ավարտին հասցնել մինչ երեկո: Այնուամենայնիվ, եթե չկարողանան ավարտել, ապա գազամատակարարումը կվերականգնվի առավոտյան:

Քամին մոլեգնել էր նաև նախկին «Մասլոպրոմի» հին շենքի մոտակայքում, իսկ որտեղ չէր կարողացել աղբամանները քշել՝ դրանք տապալել էր:

Jnews.ge