Ախալքալաքցիները բողոքում են, որ քաղաքում մայթերով քայլելն անհնար է, դրանք սառույցով են ծածկվել, ձյան տեղումներից հետո դրանք չեն մաքրվել: Մի քանի օր առաջ մի կին ընկել և ոտքն է կոտրել, նույնիսկ պահանջվել էր վիրահատական միջամտություն, որն անց էր կացվել Երևանում: Ո՞վ է պատասխանատու Ախալքալաքում մայթերը մաքրելու համար, պատասխանը միանշանակ չէ:

Բնակիչները տեղական իշխանություններին խնդրում են հնարավորինս արագ լուծել այդ խնդիրը ,քանի որ վտանգավոր է մայթերով քայլելը, իսկ մայթեզրով անցնելը մեքենաների հետ միասին՝ նույնպես:

Ականատեսների խոսքով՝ Նալբանդյան փողոցի մայթին մոտ օրերս մի երիտասարդ կին ընկել է և կոտրել ոտքը: Վերջերս Jnews-ի խմբագիրություն բազմիցս դիմել են խնդրանքով՝ բարձրացնել այս հարցը:

Քաղաքի փողոցները ձյունից մաքրելու տենդերը շահել է «Ջավախ Ավտո Գզա» ընկերությունը` 97 997.00 լարիով: Այնուամենայնիվ, մրցութային փաստաթղթերում նշված չէ, թե արդյոք այս փողոցների մայթերի մաքրումը մտնում է տենդերը շահողի պատասխանատվության ներքո:

Ըստ Ախալքալաքի փոխքաղաքապետ Արմեն Մառանգոզյանի, «Ջավախ Ավտո Գզա» ընկերությունը պետք է մաքրի քաղաքի ճանապարհներն ու որոշ փողոցները ձյունից, իսկ մայթերը՝ Ախալքալաքի Սպասարկման կենտրոնը:

Ըստ Սպասարկման կենտրոնի տնօրեն Արմեն Բիչախչյանի, քաղաքապետարանի հետ պաշտոնական համաձայնություն չկա՝ մայթերը ձյունից մաքրելու մասին, սակայն որոշ մայթեր և փողոցներ մաքրվում են Կենտրոնի կողմից: Ըստ նրա, նրանք վերջերս մաքրել են նախկին զինվորական ավանը քաղաքին միացնող կամուրջը, Ազատության փողոցը՝ մինչև լուսացույցերը, զբոսայգու շրջակայքը և մի քանի այլ այլ փողոցներ:

«Մենք քիչ ռեսուրսներ ունենք, այդ իսկ պատճառով մենք չենք կարող մաքրել ամբողջ քաղաքը», – ասում է Արմեն Բիչախչյանը:

Նալբանդյան փողոցի մաքրումը, որտեղ վերջերս քաղաքի բնակչուհին կոտրել էր ոտքը՝ «Ջավախ Ավտո Գզա» ընկերության վրա է, սակայն, հայտնի չէ, թե ով պետք է մաքրի նույն փողոցի մայթերը:

«Քանի որ այս փողոցում հիմնականում մասնավոր խանութներ են և առևտուրն իրականացվում է փողոցում, այդ պատճառով տեխնիկան չի կարող աշխատել», – ասում է Արմեն Բիչախչյանը:

Քաղաքի ձնեմաքրման աշխատանքների տենդերային փաստաթղթերի համաձայն՝ «Ջավախ Ավտո Գզա» ընկերությունը պետք է մաքրի 26 գյուղական ճանապարհ՝ ընդհանուր 174 կմ: Բացի գյուղական ճանապարհներից, ընկերությունը պետք է մաքրի քաղաքի հետևյալ փողոցները՝ Ազատության, Նալբանդյանի, Չարենցի, Թումանյանի, Թամարա Թագուհու, Մաշտոցի, Դարբինյանի, Մալխասյանի, Ճավճավաձեի, Ռուսթավելիի, Միկոյանի, Մարգարյանի, Ջավախիշվիլիի և Գուսան Հավասու: