Լոնդոնում տեղատարափ անձրևները հանգեցրել են տասնյակ քաղաքային փողոցների հեղեղմանը։ Քաղաքի մի քանի շրջաններում կաթվածահար է արել ավտոմոբիլային երթևեկությունը: Այս մասին հայտնել է BBC-ն՝ վկայակոչելով Միացյալ Թագավորության օդերևութաբանական ծառայությունը։

Նշվում է, որ Լոնդոնի փրկարարական ծառայությունները հարյուրավոր զանգեր են ստացել ավտոճանապարհների հեղեղման մասին, սակայն այս պահին իշխանությունները տեղեկություններ չունեն տեղատարափ անձրևների պատճառով տուժածների մասին:

Շվեյցարիայի Լյուցեռնում և Ցուգում, ինչպես նաև երկրի կենտրոնական մասի որոշ այլ շրջաններում հորդառատ անձրևներն ու ամպրոպները հանգեցրել են շենքերի հեղեղման:

Հաղորդվում է, որ ամպրոպն ու կարկուտը սկսվել են շաբաթ կեսօրին: Այդ ժամանակից ի վեր Լյուցեռնի ոստիկանության օպերատիվ կենտրոնը ստացել է ավելի քան 210 դեպքի մասին հաղորդում:

Ցուգում՝ հինգ քաղաքներում հեղեղվել են մի քանի նկուղներ, ստորգետնյա ավտոտնակներ և փողոցներ:

Կոստա Ռիկայում հորդառատ անձրևների հետևանքով մի քանի շրջաններ հայտնվել են տարերային աղետի գոտում: Վատ եղանակի պատճառով փակում են ճանապարհները և տարհանում մարդկանց, հայտնում է Tico Times-ը։

Ամենաուժեղ տեղումները գրանցվել են հուլիսի 22-ին և 23-ին։ Կոստա Ռիկայի արտակարգ իրավիճակների ազգային հանձնաժողովը հաղորդել է 480 պատահարների մասին, որոնք կապված են վատ եղանակի հետ, այդ թվում՝ 391 ջրհեղեղների և 43 սողանքների մասին:
Չինաստանի Հայնան նահանգում 63 մարդ է զոհվել տեղատարափ անձրևներից առաջացած ջրհեղեղների պատճառով: Եվս հինգ մարդ անհետ կորած է: Իշխանությունները վտանգավոր շրջաններից տարհանել են շուրջ 900 հազար մարդու: Չինաստանում տարերային աղետից տուժած մարդկանց ընդհանուր թիվը գերազանցել է 11 միլիոնը: Քանդվել կամ մասնակի վնասվել է 8876 շինություն:
Նահանգային իշխանությունները հայտարարել են արտակարգ իրավիճակների ամենաբարձր մակարդակ: Փրկարարական և աղետի հետևանքների վերացման աշխատանքներին մասնակցում է շուրջ 200 հազար մարդ:
Պակիստանի հյուսիս-արևմուտքում անձրևի հետևանքով դժբախտ պատահարներից զոհվել է առնվազն 15 մարդ, ևս 26-ը վիրավորվել է: Այդ մասին ուրբաթ՝ հուլիսի 23-ին, հաղորդել է «Սինհուա» գործակալությունը:

Վատ եղանակ է եղել Հուբեր Պախտունխվա նահանգում: Մահվան դեպքերի մեծ մասը տեղի է ունեցել տանիքի փլուզման և հեղեղումների ժամանակ: Միևնույն ժամանակ, տասնյակ շենքեր ավերվել կամ վնասվել են անձրևաջրերից:

«Քաղաքացիական վարչակազմը փրկարարների և ոստիկանության հետ փրկարարական գործողություններ է իրականացնում տուժած շրջաններում: Իշխանությունները նաև երթևեկության համար բացել են մի քանի ճանապարհներ, որոնք նախկինում արգելափակվել էին սողանքներով»,- գրում է գործակալությունը:

Իրենց հերթին, նահանգում ծառայություններին հանձնարարվել է արագացնել փրկարարական աշխատանքները և բարձրացնել պատրաստվածությունը, քանի որ կանխատեսվում է, որ տեղումները կշարունակվեն: