Ստամբուլի Իսթիքլալ պողոտայում ռումբ թողած և պայթյունն իրականացրած կասկածյալը ձերբակալվել է,- այս մասին հայտարարել է Թուրքիայի ներքին գործերի նախարար Սուլեյման Սոյլուն։

Թուրքիայի կառավարության ներկայացուցչի խոսքով՝ նախնական գնահատմամբ՝ ահաբեկչությունը պատվիրվել է Սիրիայի հյուսիսում գտնվող Այն ալ Արաբ քաղաքից, որտեղ գործում են «Քրդստանի աշխատավորական կուսակցությունը» և «Ժողովրդի պաշտպանության ստորաբաժանումներ» քրդական խմբավորումները։ Սուլեյման Սոյլուի խոսքով՝ Թուրքիան շարունակելու է իր ամուր և օրինական պատերազմն ահաբեկչության դեմ։

«Մոտ վեց տարի Ստամբուլում երեկվա նման ահաբեկչություն չի եղել։ Միայն այս տարի մենք կանխել ենք մոտ 200 ահաբեկչական միջադեպ։ Որպես ազգ, որպես երկիր, դուք ծանր գին եք վճարելու մեր կորցրած կյանքերի համար։ Իհարկե, մենք գիտենք, որ մեր աշխարհագրության մեջ մեծ մարտահրավեր է կանգնած։ Մենք գիտենք, թե այս ակցիան իրականացնողներն ինչ ուղերձ են ուզում փոխանցել։ Մենք ստացանք այս հաղորդագրությունը: Իհարկե, մեր ոստիկանապետի, ահաբեկչության վարչության պետի, հետախուզության պետի համակարգմամբ այս միջադեպի մեղավորներին բացահայտելու համար մեծ ջանքեր են գործադրվել։ Մեր գնահատմամբ՝ մեղավորը եկել է Աֆրինից։ Հազարավոր մեր հերոսները սահմանի լեռներում, հազարավոր մեր հերոսները քաղաքներում, որոնք պայքարում են ահաբեկչությունը կանխելու համար։ Ռումբը տեղադրած անձը ձերբակալված է: Մինչ այդ ձերբակալել էինք ևս 21 հոգու։ Ահաբեկչության դեմքը մռայլ է, բայց մենք կշարունակենք այս պայքարը մինչև վերջ, ինչ գնով էլ լինի, և սա, հավանաբար, մեր այսպես կոչված դաշնակիցների անազնվությունն է, որոնք կարծես թե բարյացակամ են մեր նկատմամբ, ովքեր կամ թաքցնում են բոլոր ահաբեկիչներին իրենց մեջ, սեփական երկրում կամ թույլ են տալիս ահաբեկիչներին ապրել իրենց օկուպացված տարածքներում և այն տարածքներում, որոնք նրանք կառավարում են և գումար են ուղարկում իրենց իսկ սենատներից»,- ասել է Թուրքիայի ՆԳ նախարարը։

Վերջին տվյալներով՝ Ստամբուլում տեղի ունեցած ահաբեկչության հետևանքով զոհվել է ութ մարդ, վիրավորվել՝ 81-ը։ Տուժածներից 50-ն արդեն դուրս են գրվել հիվանդանոցից, հինգը գտնվում են վերակենդանացման բաժանմունքում։