«Կենտրոնի գոյությունը կենսական նշանակություն ունի աուտիստական սպեկտրի երեխաների համար» - Էլիսո Թաթեշվիլի

Լուրեր

04.08.2024

«Երեխաների և դեռահասների զարգացման կենտրոնը» Ախալցիխեում գործում է 2018 թվականից: Կենտրոնը աուտիստական սպեկտրի խանգարումներ ունեցող երեխաներին և դեռահասներին առաջարկում է վարքագծի կառավարման թերապիա, ինչպես նաև լոգոպեդի և հոգեբանի ծառայություններ, որոնք շատ կարևոր են նրանց զարգացման համար:

Այս պահին երեխաների և դեռահասների կենտրոնն ունի մոտավորապես քսան շահառու: Նրա հիմնադիր և ղեկավար Էլիսո Թաթեշվիլին ասում է, որ դիմողներ շատ են և աշխատանքը շարունակելը անհրաժեշտ է, սակայն այսօր ուժի մեջ մտած այսպես կոչված «ռուսական օրենքը», որը ընդունվել է խորհրդարանի կողմից, որքանով թույլ կտա շարունակել այս աշխատանքը, հայտնի չէ: Նա դեռ չգիտի, թե ինչպես կշարունակի աշխատանքը:

«Հիմնականում ֆինանսավորվում ենք օտարերկրյա դրամաշնորհներով և ամեն ինչ հրապարակային և թափանցիկ է: Չգիտեմ ինչ որոշում կընդունենք, բայց երեխաների համար այս կենտրոնը կենսական նշանակություն ունի, քանի որ այստեղ գտնվելը նրանց համար թերապիա է, որը հիմնված է հետազոտությունների վրա: Շատ առաջընթաց ենք տեսել շահառուների մոտ, ինչպես գիտեք, սա այն վիճակն է, որը նրանց ամբողջ կյանքում կուղեկցի: Հետևաբար, կարևոր է փոքր տարիքից լուծել այն դժվարությունները, որոնք ունեն: Ուստի, եթե ընդհատում լինի, դա կհանգեցնի շահառուների վիճակի վատթարացման» - ասում է Էլիսո Թաթեշվիլին: Չնայած տասնյակ հազարավոր քաղաքացիների, հասարակական և մեդիա կազմակերպությունների հակազդեցությանը, Վրաստանի խորհրդարանն ընդունեց «Օտարերկրյա ազդեցության թափանցիկության մասին» օրենքը մայիսի 14-ին, իսկ մայիսի 28-ին հաղթահարեց Վրաստանի նախագահի վետոն։ Վրաստանի իշխանությունների ներկայացուցիչների պնդմամբ, այս օրենքի նպատակը օտարերկրյա ֆինանսավորումների թափանցիկությունն ապահովելն է:

Օրենքի համաձայն, այն լրատվամիջոցները և հասարակական կազմակերպությունները, որոնք իրենց ֆինանսավորման 20%-ից ավելին ստանում են օտարերկրյա դոնորներից, ստիպված են գրանցվել որպես «օտարերկրյա ուժի շահերը կրող կազմակերպություններ», հակառակ դեպքում՝ կտուգանվեն: Նման օրենքը գործում է Ռուսաստանում 2012 թվականից, որը բազմաթիվ կազմակերպությունների փակման պատճառ է դարձել։ Ռուսաստանում այլևս չկան անկախ լրատվամիջոցներ և քաղաքացիական հասարակություն:

Այսպես կոչված «ռուսական օրենքի» ընդունման պատճառով ԱՄՆ-ն սահմանել է պատժամիջոցներ կառավարության ներկայացուցիչների նկատմամբ։