Ըստ պաշտոնական վիճակագրական տվյալների, Վրաստանում գարնանային ցանքատարածությունները կրճատվում են։ Մասնավորապես, նախնական տվյալներով, այս տարի ցանքատարածությունների մակերեսը կազմել է 132.7 հազար հեկտար, մինչդեռ 10 տարի առաջ երկրում կար 216.5 հազար հեկտար գարնանային ցանքատարածություն։

Վրաստանի գյուղատնտեսության նախկին փոխնախարար և «Ագրո 1959» ընկերության կառավարող գործընկեր Գելա Խանիշվիլին հայտարարում է, որ գարնանային ցանքատարածությունների կրճատման պատճառը մայրուղիների կառուցումն է. «Վերջին 10 տարիների ընթացքում ինտենսիվորեն կառուցվում են մայրուղիներ, և դրանից մոտ 15-20 հազար հեկտար գյուղատնտեսական հող է զոհաբերվել»։

Նրա գնահատմամբ, ցանքատարածությունների կրճատման երկրորդ պատճառը զբոսաշրջային և ամառանոցային տիպի տնտեսություններն են։ Խանիշվիլիի խոսքով, գյուղատնտեսական հողերի մի մասը վերածվել է զբոսաշրջային նշանակության կամ բնակելի ենթակառուցվածքների։

«Զբոսաշրջային և ամառանոցային տնտեսությունները զարգանում են ինտենսիվորեն։ Օրինակ, Մցխեթայի և Սագուրամոյի շրջաններում նախկինում կային գյուղատնտեսական հողեր, որտեղ ցանվում էին եգիպտացորեն, գարի և այլ մշակաբույսեր։ Փաստորեն, Թբիլիսիի շրջակայքում հողերի մեծ մասը վերածվել է բնակելի շենքերի թաղամասերի և ամառանոցային տարածքների։ Դրան գումարվում են հազարավոր զբոսաշրջային օբյեկտներ, ինչը հիմնականում հանգեցնում է գյուղատնտեսական հողերի կորստի»,- ասում է Խանիշվիլին։

Բացի ենթակառուցվածքների զարգացումից, նա խոսում է նաև գյուղատնտեսության ոլորտում պետական ծրագրերի մասին և նշում, որ նախագծերի մեծ մասը նպատակաուղղված է բազմամյա մշակաբույսերի զարգացմանը, քանի որ դրանք ավելի շահավետ են, քան մեկամյա մշակաբույսերը։