ԱՄՆ պետքարտուղար Մարկո Ռուբիոն հայտարարել է, որ ԱՄՆ-ն չեղարկել է առնվազն 300 օտարերկրացի ուսանողի վիզա՝ ԱՄՆ նախագահ Դոնալդ Թրամփի ջանքերի շրջանակներում, որոնք ուղղված են համալսարաններում պաղեստինամետ ցուցարարների գործունեության կանխարգելմանը։

«Այս պահին հնարավոր է, որ թիվը գերազանցում է 300-ը։ Մենք ամեն օր իրականացնում ենք նման միջոցներ, երբ հայտնաբերում ենք յուրաքանչյուր նման «խելագարի»»,- ասել է Ռուբիոն։

Ռուբիոյի խոսքով՝ ուսանողները վիզա ստանում են միայն կրթություն ստանալու նպատակով, «ոչ թե սոցիալական ակտիվիզմի, որը քայքայում է համալսարանների տարածքները»։

«Եթե դուք խաբեությամբ եք ստանում վիզա և դրանից հետո ներգրավվում եք նման գործողություններում, մենք կչեղարկենք ձեր վիզան»,- նշել է Ռուբիոն։

Ավելի վաղ Սպիտակ տունը նաև չեղարկել էր 400 մլն դոլարի ֆինանսավորումը Կոլումբիայի համալսարանին։ ԱՄՆ նախագահի խոսքով՝ պատճառն այն է, որ համալսարանը չէր պայքարում անտիսեմիտիզմի դեմ իր տարածքում, և նշել էր, որ ֆինանսավորումը կդադարեցվի նաև այլ համալսարանների համար։