Ռուսաստանի նախագահ Վլադիմիր Պուտինը հրամանագիր է ստորագրել գարնանային զորակոչի մասին։

«2025 թվականի ապրիլի 1-ից հուլիսի 15-ը Ռուսաստանի Դաշնության 18-ից 30 տարեկան քաղաքացիներին, ովքեր ռեզերվում չգտնվեն և ենթակա են զինվորական ծառայության զորակոչի 160 000 հոգու չափով, զորակոչ անցկացնել»,- ասված է հրամանում։

Ռուսական լրատվամիջոցների փոխանցմամբ՝ նախորդ տարվա գարնանային զորակոչն ընդգրկել է 150 հազար մարդ, 2023 թվականին՝ 147 հազար մարդ, 2022 թվականին՝ 134,5 հազար մարդ։ Աճը կապված է ռուսական բանակի թվաքանակն աստիճանաբար մեծացնելու Պուտինի հրամանի կատարման հետ։

2022 թվականի սկզբին Ռուսաստանում կար մոտավորապես մեկ միլիոն զինվորական։ Վերջին երեք տարիների ընթացքում Ռուսաստանի Դաշնության բանակում անձնակազմի թիվը հասել է 1,5 միլիոնի։ Անցյալ տարի զորակոչի տարիքային շեմը 27-ից բարձրացվել է 30-ի։ Ստորին սահմանը, չնայած ՌԴ կառավարության նախնական խոստումներին, որ այն նույնպես կավելանա, մնաց անփոփոխ՝ 18 տարի։