აბასთუმნის ტყეში მძიმე ტექნიკა შეიყვანეს. როგორც შინაგან საქმეთა მინისტრმა გიორგი მღებრიშვილიმა განაცხადა, აღნიშნული ტექნიკა გზების გაჭრას დაიწყებს, რათა სახანძრო მანქანებს ცეცხლის კერამდე მისვლა გაუადვილდეთ.
„ჩვენ გამოვიძახეთ მძიმე ტექნიკა, რომელიც უახლოეს საათებში ადგილზე იქნება და გზების გაჭრას დაიწყებს, რათა სახანძრო მანქანები ცეცხლის კერამდე მივიდეს. ასევე ჩართულია ცოცხალი ძალა, მეხანძრე-მაშველები ადგილზე არიან, ასევე შემოგვიერთდა განსაკუთრებულ დავალებათა დეპარტამენტის პირადი შემადგენლობა, რომელმაც ბორჯომშიც და ახალციხეშიც მოახდინა ხანძრის კერების ლიკვიდაცია. ეს ადამიანები გადმოვისროლეთ ამ ცხელ წერტილში“, - განაცხადა მღებრიშვილმა.

მისივე თქმით, ადგილზე მობილიზებულია ცოცხალი ძალა და მეხანძრე-მაშველები. თუ საჭირო გახდა, მეგობარი ქვეყნების ჩართულობა აბასთუმანის ტყეში ხანძრის ლიკვიდაციაში, ჩვენ აუცილებლად მივმართავთ, - განაცხადა შს მინისტრმა გიორგი მღებრიშვილმა ჟურნალისტებთან საუბარში.

მღებრიშვილის თქმით, აბასთუმნის თავზე ცეცხლის ახალი კერაა, რომელიც დასახლებული პუნქტიდან საკმაოდ შორს არის. მინისტრის ინფორმაციით, მიუვალი ტყეა და გზები პრაქტიკულად არ არის.

„დაბნელებამდე იმუშავებს ვერტმფრენი, რაც შეეხება ცოცხალ ძალას, მთელი ღამის განმავლობაში იმუშავებს ტყეში. ჩვენ ახლა დამატებით ძალებს კიდევ ვაგზავნით იმისათავის, რომ ადგილზე მოახდინონ ცეცხლის ლოკალიზება“, - განაცხადა შს მინისტრმა.

მინისტრის განცხადებით, ამ ეტაპზე შეუძლებელია იმის თქმა, თუ რა ფართობზეა გავრცელებული ცეცხლი.