წაღვერის ტყეში, ამ დროისათვის, ავიაცია და ცოცხალი ძალა მუშაობს. პროცესში მეხანძრე-მაშველებთან ერთად, განსაკუთრებულ დავალებათა დეპარტამენტის თანამშრომლებიც ჩაერთვნენ.
ხანძარს დაახლოებით 600-მდე ადამიანი ებრძვის. მობილიზებულია მძიმე ტექნიკა. საჭიროების შემთხვევაში შესაძლოა საქართველოს მთავრობამ დასახმარებლად მეზობელ ქვეყნებს მიმართოს.



წაღვერში ცეცხლის ლოკალიზება ამ დრომდე ვერ ხერხდება. არჯევანიძის ტყის მიმდებარე ტერიტორიაზე ძლიერი კვამლია, სამაშველოს პროცესს ქარი უშლის ხელს.



სამაშველო სამუშაოებში ვერტმფრენიც არის ჩართული. ხანძრის კერებთან მობილიზებულია მაღალი გამავლობის ხანძარსაწინააღმდეგო ტექნიკა. ინფრასტრუქტურის მინისტრმა და შინაგან საქმეთა მინისტრის მოადგილემ, ასევე ეროვნული სატყეო სააგენტოს წარმომადგენლებმა, სამოქმედო გეგმის შემუშავების მიზნით, საგანგეშო შტაბში სხდომა გამართეს.




სოფელ დაბასთან, 2008 წლის ნახანძრალ ტერიტორიაზე ხანძარი 20 აგვისტოს დღისით გაჩნდა. ცეცხლი 2014-2017 წლებში აღდგენილი ტერიტორიების ზემოთ არსებულ ფერდობზე იყო გავრცელებული. 21 აგვისტოს ცეცხლის ლოკალიზება მოხერხდა, თუმცა, ქარის გამო ხანძრის ახალი კერები გაჩნდა.