ივანე ჯავახიშვილის სახელობის თბილისის სახელმწიფო უნივერსიტეტის დავის ალტერნატიული გადაწყვეტის ეროვნული ცენტრის (TSU NCADR) ორგანიზებით, საქართველოს ადვოკატთა ასოციაციასთან (GBA) თანამშრომლობის ფარგლებში, 6 ოქტომბერს, სამცხე-ჯავახეთის სახელმწიფო უნივერსიტეტში
16:00 საათიდან 20:00 საათამდე გაიმართება საჯარო ლექცია თემაზე: მედიაცია - საქმიანობის ახალი სფერო საქართველოში და სამართლებრივი რეგულირების პერსპექტივები.

საჯარო ლექცია მიზნად ისახავს მონაწილეთათვის მედიაციის ინსტიტუტის არსებული საკანონმდებლო მოწესრიგებისა და რეგულირების პერსპექტივების, დავის გადაწყვეტის საშუალებათა სისტემაში მედიაციის უპირატესობების, მედიატორის საკვალიფიკაციო მოთხოვნებისა და ეთიკური მოვალეობების, მედიაციის სახელმწიფოებრივი ინსტიტუციონალიზაციის პროცესში სამედიაციო საქმიანობის პროფესიად ფორმირების პერსპექტივების გაცნობას.

საჯარო ლექციაზე მოწვეულნი იქნებიან მოსამართლეები, ადვოკატები, უნივერსიტეტის პროფესორ-მასწავლებლები, სტუდენტები, იურიდიული საზოგადოებისა და მედიის წარმომადგენლები, სხვა დაინტერესებული პირები.

ღონისძიებას გაუძღვებიან დავის ალტერნატიული გადაწყვეტის ეროვნული ცენტრის ექსპერტები, სამართლის დოქტორი, ასოც. პროფესორი, სერტიფიცირებული მედიატორი, საქართველოს მედიატორთა ასოციაციის თავმჯდომარე - გიორგი ცერცვაძე, ასისტ. პროფესორი, სამართლის დოქტორი, სერტიფიცირებული მედიატორი - დავის ალტერნატიული გადაწყვეტოს ეროვნული ცენტრის აღმასრულებელი დირექტორი - ნათია ჩიტაშვილი და სასამართლო მედიატორი, სამართლის დოქტორი - ალექსანდრე წულაძე.

მედიაციის ცნობიერების ამაღლების პროგრამა დავის ალტერნატიული გადაწყვეტის ეროვნული ცენტრის მიერ აღმოსავლეთ-დასავლეთის მართვის ინსტიტუტის პროგრამის ,,კანონის უზენაესობის მხარდაჭერა საქართველოში (EWMI-PROLoG)" ხელშეწყობით ხორციელდება.