ე.წ „რუსული კანონის“ გამო მორიგი ნაბიჯი ამერიკისგან - MEGOBARI აქტი მიღებულია

პოლიტიკა

13.07.2024

აშშ-ის წარმომადგენელთა პალატის საგარეო საქმეთა კომიტეტმა MEGOBARI აქტი დაამტკიცა და მალე ძალაში შევა. შესაბამისი კენჭისყრა აშშ-ის კონგრესის ქვედა პალატის, წარმომადგენელთა პალატის - საგარეო საქმეთა კომიტეტის სხდომაზე გაიმართა. ანგარიშვალდებულების, გამძლეობისა და დამოუკიდებლობის ასაშენებლად საქართველოს შესაძლებლობების მობილიზებისა და გაძლიერების აქტს მხარი 41 კონგრესმენმა დაუჭირა.

კონგრესმა აქტის დამტკიცება, მას შემდეგ გადაწყვიტა, რაც საქართველოს პარლამენტმა მიიღო ე.წ „რუსული კანონი“ რომელიც ეწინააღმდეგება დასავლეთის ღირებულებებს. აქტში სხვა ბევრ დეტალთან ერთად გაწერილი ისიც, რომ მოხდება იმ პირების იდენტიფიცირება, რომლებიც საქართველოში დემოკრატიას ძირს უთხრიან და მათთვის სანქციებისა და მოგზაურობის აკრძალვები დაწესდება, ასევე საქართველოში დემოკრატიული გარემოს მონიტორინგისა და ხელშეწყობის მიზნით სამუშაო ჯგუფი შეიქმნება, განსაკუთრებით არჩევნების დროს, რათა სამართლიანი და თავისუფალი საარჩევნო პროცესები უზრუნველყოფილი იყოს.

„ამერიკამ ქართულ ჯარს უკვე შეუჩერა სწავლებები, ამ აქტის დამტკიცება, კი იმას ნიშნავს, შეაჩერებს სხვა პროგრამებსაც და შეეხება თითქმის ყველა სფეროს, მათ შორის პედაგოგებს, სოფლის მეურნეობას, მედიცინას და ასე შემდგე. როგორც კი ეს აქტი ძალაში შევა, თითოეული ადამიანი იგრძნობს საკუთარი ხელისუფლების ბოროტი მოქმედებების შედეგს. ამ ვითარებაში კი ხელისუფლებას თავი ისე უჭირავს თითქოს არაფერი ხდება“- ასე ეხმაურება, მიმდინარე მოვლენებს და დასავლეთის რეაქციას, ქვეყნის ყოფილი თავდაცვის მინისტრი და „სამოქალაქო იდეის“ ხელმძღვანელი თინა ხიდაშელი.

თინა ხიდაშელის თქმით, ეს მხოლოდ დასაწყისია და არამხოლოდ ამერიკის მხრიდან, ევროპის ყველა ქვეყნიდან, ამ პროცესებს ჯაჭვური რეაქცია ექნება და საბოლოო ჯამში საქართველო მხოლოდ რუსული ქვეყანა გახდება. ამის ერთადერთ გამოსავლად კი ხიდაშელს 26 ოქტომბრის არჩევნებზე ხელისუფლების შეცვლა მიაჩნია.

ბოლო დროინდელ მოვლენებზე საუბრობს ახალციხეში ადგილობრივი არასამთავრობო ორგანიზაციის „ახალციხის ახალგაზრდული ცენტრის“ დირექტორი მაკა სუდაძეც.

„ამ კანონმა უკვე დაგვაზარალა და გვეუბნებიან, რომ ჯერ კიდევ ყველაფერი წინაა. ეს, ხელისუფლების მხრიდან, ხალხის წინაშე დიდი მავნებლობაა. ყველაზე უარესი კი ისაა, რომ „რუსულ კანონზე“ ხელისუფლება გვიმტკიცებს, რომ კარგია, არადა მთელი საერთაშორისო საზოგადოება ეუბნება, რომ დემოკრატიულ პრინციპებს არღვევს“ -გვეუბნება მაკა სუდაძე.

კანონის ამოქმედების შემდეგ, რამდენ ხანს, ან რა ფორმით გააგრძელებს „ახალციხის ახალგაზრდული ცენტრი“ მუშაობას მაკა სუდაძემ ეს ჯერ არ იცის, თუმცა იცის, რომ იბრძოლებს.

ათიათასობით მოქალაქის, საზოგადოებრივი და მედიაორგანიზაციების წინააღმდეგობის მიუხედავად, საქართველოს პარლამენტმა 14 მაისს კანონი "უცხოური გავლენის გამჭვირვალობის შესახებ" მაინც მიიღო, 28 მაისს კი საქართველოს პრეზიდენტის ვეტო დაძლია. საქართველოს ხელისუფლების წარმომადგენლების მტკიცებით, კანონის მიზანია, უცხოეთიდან შემოსული დაფინანსებები გამჭვირვალე იყოს.

კანონის მიხედვით, ის მედია და საზოგადოებრივი ორგანიზაციები, რომლებიც დაფინანსების 20%-ზე მეტს უცხოელი დონორებისგან იღებენ, იძულებულნი ხდებიან დარეგისტრირდნენ, როგორც "უცხოური ძალის ინტერესების გამტარებელი ორგანიზაცია", წინააღმდეგ შემთხვევაში დაჯარიმდებიან. მსგავსი კანონი 2012 წლიდან მოქმედებს რუსეთში. კანონის ამოქმედების შემდეგ ოკუპანტ ქვეყანაში მრავალი ორგანიზაცია დაიხურა. რუსეთში აღარ არსებობს დამოუკიდებელი მედია და სამოქალაქო საზოგადოება.

როგორც უკვე ცნობილია, საქართველოში მიმდინარე პროცესებს დასავლეთის მხრიდან მძაფრი რეაქცია მოჰყვა. კრიტიკულ განცხადებებთან ერთად, საქართველოს ევროპაში ინტეგრაციის პროცესი შეჩერდა, ამოქმედდა სხვადასხვა სანქციები და ფინანსური შეზღუდვები, როგორც ევროპის ისე ამერიკის მხრიდან.