ადიგენის მუნიციპალიტეტის საკრებულოში რიგგარეშე სხდომის ჩანიშვნის მოთხოვნით განცხადება შევიდა, რომელსაც ხელს 13 დეპუტატი აწერს. რიგგარეშე სხდომაზე თავმჯდომარის გადაყენებას მოითხოვენ.

ლევან ლობჯანიძე "მეცხრე არხთან" აცხადებს, რომ იგი შვებულებაშია და სხდომა შვიდი დღის ვადაში საკრებულოს თავმჯდომარის მოადგილემ უნდა ჩანიშნოს.

თამაზ ძაძამიას განმარტებით კი ლევან ლობჯანიძე შვებულებიდან 14 თებერვალს გამოვა და სხდომასაც თავად ჩანიშნავს. მისივე თქმით, რეგლამენტი მას საშუალებას არ აძლევს საკრებულოს რიგგარეშე სხდომა დანიშნოს.

ადგილობრივი თვითმმართველობის შესახებ საქართველოს ორგანული კანონის 34–ე მუხლის მიხედვით, საკრებულოს თავმჯდომარის მოადგილე საკრებულოს თავმჯდომარის დავალებით ასრულებს მის მოვალეობას საკრებულოს თავმჯდომარის არყოფნისას, მის მიერ უფლებამოსილების განხორციელების შეუძლებლობის შემთხვევაში ან თანამდებობიდან მისი გადადგომისას ანდა გადაყენებისას.

ამავე კანონის 24 მუხლის მესამე ნაწილის მიხედვით, საკრებულოს რიგგარეშე სხდომას მოთხოვნის (წინადადების) წარდგენიდან 1 კვირის ვადაში იწვევს საკრებულოს თავმჯდომარე. საკრებულოს თავმჯდომარის მიერ რიგგარეშე სხდომის ამ ვადაში მოუწვევლობის შემთხვევაში საკრებულო უფლებამოსილია შეიკრიბოს. საკრებულოს წევრთა გაფრთხილებას რიგგარეშე სხდომის მოწვევის თაობაზე ინიციატორის წერილობითი მიმართვის საფუძველზე უზრუნველყოფს საკრებულოს თავმჯდომარე. რიგგარეშე სხდომაზე საკრებულოს თავმჯდომარისა და საკრებულოს თავმჯდომარის მოადგილის (მოადგილეების) გამოუცხადებლობის შემთხვევაში სხდომას თავმჯდომარეობს დამსწრეთაგან უხუცესი წევრი.

ადიგენის მუნიციპალიტეტის საკრებულოს დეპუტატებმა რიგგარეშე სხდომის ჩანიშვნის მოთხოვნით საკრებულოს 8 თებერვალს მიმართა. ლევან ლობჯანიძე უზენაესი სასამართლოს განჩინებით, 7 თებერვალს თანამდებობაზე აღდგა. ამავე გადაწყვეტილებით, მუნიციპალიტეტს განაცდურის ანაზღაურება დაეკისრა, რომელმაც დაახლოებით 62 000 ლარი შეადგინა. ოპოზიციონერი დეპუტატი გივი ენდელაძე ირწმუნება, რომ აღნიშნული თანხა იმ 17–მა დეპუტატმა უნდა დააბრუნოს, რომელმაც ორი წლის წინ ლევან ლობჯანიძის გადაყენების დოკუმენტს ხელი მოაწერა.