საკონსტიტუციო ცვლილებების განხილვისას ირაკლი კობახიძე პრეზიდენტის სტატუსისა და უფლება–მოვალეობების განსაზღვრას შეეხო. მისი თქმით, ახალი ჩანაწერის მიხედვით, პრეზიდენტს სტატუსი არ შეეზღუდება. პრეზედენტი არის ქვეყნის უმაღლესი მთავარსარდალი და ასე იქნება ახალ კონსტიტუციაშიც – აღნიშნავს საქართველოს პარლამენტის თავმჯდომარე.

"მთავარია ამ ჩანაწერებმა არ დაგვაბნიოს. როცა საუბარია სახელმწიფოს მეთაურზე. ერთი შეხედვით შეიძლება მოგვეჩვენოს რომ ეს ჩანაწერი გულისხმობს პრეზიდენტის მიერ სახელმწიფოს მართვის განხორციელებას. სახელმწიფოს მეთაური პრეზიდენტებს და მონარქებს ეწოდებათ ყველა ქვეყანაში. ეს არ ნიშნავს, რომ პრეზიდენტი მართავს ქვეყანას. ჩვენს შემთხვევაში მიუხედავად იმისა, რომ პროზიდენტი არის სახელმწიფოს მეთაური, ის არ არის პასუხისმგებელი ქვეყნის მართვაზე".

რაც შეეხება პრეზიდენტის უფლებამოსილებებს კობახიძის თქმით, მისი შეზღუდვა 2010 წელს მოხდა. მისი თქმით, თუ არ შეიცვლება ქვეყნის მმართველობის სისტემა, პრეზიდენტის კომპეტენციის ვერც გაზრდა და ვერც შემცირება მოხერხდება.

"არის საუბარი მხოლოდ ორ კომპეტენციაზე, რომელიც გადაისინჯება ახალი ცვლილებების საფუძველზე. ერთი ეს არის უზენაესი სასამართლოს მოსამართლეთა წარდგენის უფლება–მოსილება. გვაქვს ვენეციის მკაფიო რეკომენდაცია. ისინი გვეუბნებიან, რომ უმჯობესია წარმდგენი იყოს ამ შემთხვევაში იუსტიციის უმაღლესი საბჭო და მეორე, საუბარია ეროვნული უშიშროების საბჭოს ჩანაცვლებაზე ეროვნული თავდაცვის საბჭოთი. რაც შეეხება უშიშროების საბჭოს, აქაც იყო ვენეციის კომისიის რეკომენტაცია. ისინი გვეუბნებოდნენ, რომ ამ სისტემას არანაირი საერთო არ აქვს ეროვნული უშიშროების საბჭოს არსებული სახით. მთავარი პრობლემა მდგომარეობს რაში? რომ ეროვნული უშიშროების საბჭო რჩევას აძლევს პრეზიდენტს ისეთ საკითხებზე, რომელიც არის მთავრობის კომპეტენცია. ასეთი მარტივი იურიდიული ნონსენსი არის დღევანდელ კონსტიტუციაში წარმოდგენილი. 2010 წელს ჩვენ გვირჩიეს ამ ნონსენსის გამოსწორება და არ მოხერხდა. ამ ხარვეზს ვასწორებთ დღეს" – განაცხადა ირაკლი კობახიძემ.