,,საქართველოს პატრიოტთა ალიანსმა" კიდევ ერთი მერობის კანდიდატი წარადგინა. ახალქალაქში პირველი პირის პოზიციისთვის სამველ პეტროსიანი იბრძოლებს. იგი 2012–16 წწ. საქართველოს პარლამენტში ,,ერთიან ნაციონალურ მოძრაობას" წარმოადგენდა.
წარდგენისას ყოფილმა დეპუტატმა შეკრებილ მოსახლეობას სიტყვით მიმართა: ,,იმედი მაქვს, ჩვენი მოსახლეობა 50– 100 ლარად აღარ გაიყიდება და არც თავის მომავალს გაყიდის. ჩვენი მთავარი საკითხი ისტორიული სამართლიანობის აღდგენა და შესაბამისად, გენოციდის აღიარებაა. აღნიშნული საკითხი ჩვენს მიერ პარლამენტში არაერთხელ დაისვა. გამარჯვების შემთხვევაში გპირდებით, რომ ახალქალაქის მუნიციპალიტეტი აღიარებს სომხების გენოციდს, ისევე როგორც განიხილავს ოსმანეთის იმპერიის მიერ ბერძნების გენოციდის საკითხს. ძირითად ყურადღებას დავუთმობთ ეროვნული უმცირესობების უფლებების დაცვის საკითხს, ჩვენ გავაგრძელებთ გზას სახელმწიფო ენის შესწავლის მიმართულებით, ისევე როგორს დავიცავთ მშობლიურ ენას" – განაცხადა წინასაარჩევნო დაპირებების გაცემისას ახალქალაქში სამველ პეტროსიანმა.

კანდიდატის წარდგენაზე ყურადღება გამახვილდა ჯავახეთში მცხოვრები მოსახლეობისთვის მნიშვნელოვან საკითხებზე, როგორიც არის: ორმაგი მოქალაქეობის უფლება, სახელმწიფო ენის შესწავლა, სამხედრო სავალდებულო სამსახურში გაწვევა და ა.შ.  სამველ პეტროსიანმა აღნიშნა ისიც, რომ საარჩევნო კოდექსში შესული ცვლილებები მას პროაზერბაიჯანულ ნაბიჯად მიაჩნია. მერობის კანდიდატმა აქცენტი იმ პოლიტიკური ძალის წარმომადგენლებზეც გააკეთა, რომლებსაც სახელმწიფოს სახელის გამოყენებით, საკუთარი ბიზნესის განვითარება სურთ. 

წყარო: ჯეინიუსი