სახელმწიფომ დავა მაქსიმალურად მის სასიკეთოდ დაასრულა- ასე გამოეხმაურა იუსტიციის მინისტრის სტრასბურგის სასამართლოს გადაწყვეტილებას ვანო მერაბიშვილის საქმეზე.

წულუკიანის თქმით, ევროპულმა სასამართლომ დაადგინა, რომ მერაბიშვილის დაკავება, მისი წინასწარი პატიმრობა იყო კანონიერი და უარყოფილ იქნა მერაბიშვილის პოზიცია, რომ ის პოლიტიკური ნიშნით იქნა დაპატიმრებული. რაც შეეხება კონცვენციის მე-18 მუხლის დარღვევას, იუსტიციის მინისტრის განცხადებით, დიდი პალატის 17 მოსამართლის ხმები გაიყო:

"9 ხმით, 8-ის წინააღმდეგ დადგინდა, რომ დაირღვა მე-18 მუხლი იმ ერთი ინციდენტიდან გამომდინარე, რომელიც ეხება 2013 წლის 14 დეკემბრის ღამით ვანო მერაბიშვილის საკნიდან გაყვანის ფაქტს" – განაცხადა წულუკიანმა.

მისივე თქმით, მერაბიშვილისთვის სახელმწიფოს 4 ათასი ევროს გადახდა მოუწევს.

რაც შეეხება ,,ევროპული საქართველოს" პოზიციას, პარტიის წევრი ოთარ კახიძე სოციალურ ქსელში ვანო მერაბიშვილის საქმესთან დაკავშირებით წერს:

"ადამიანის უფლებათა სასამართლოს დიდმა პალატამ ივანე მერაბიშვილთან მიმართებაში ძალაში დატოვა მეთვრამეტე მუხლის დარღვევა. მე მინდა ვისურვო, რომ ეს გადაწყვეტილება იქნება გაკვეთილი ამ ხელისუფლების, რომ დამთავრდეს ჩვენს ქვეყანაში პოლიტიკური დევნა. უნდა გათავისუფლდეს, როგორც ვანო მერაბიშვილი, ისე სხვა პოლიტიკური პატიმრები, სადაც ასევე იკვეთება ევროპული კონვენციის დარღვევის ნიშვნები ".