სომხეთსა და საქართველოს შორის სავაჭრო ბრუნვა შემცირდა

ეკონომიკა

30.01.2025

სომხეთსა და საქართველოს შორის სავაჭრო ბრუნვა შემცირდა. საქსტატის მიხედვით, 2024 წელს ქვეყნებს შორის 853.711 მლნ აშშ დოლარის ვაჭრობა შედგა, ეს მაშინ როდესაც წინა წელს აღნიშნული მაჩვენებელი 1.123 მლრდ აშშ დოლარს შეადგენდა.

ამასთან, გასულ წელს, 2023 წელთან შედარებით, საქართველოდან სომხეთში ექსპორტი 787.159 მლნ აშშ დოლარიდან 617.533 მლნ აშშ დოლარამდე შემცირდა. ხოლო, სომხეთიდან იმპორტი 336.529 მლნ აშშ დოლარიდან 236.177 მლნ დოლარამდე.

2024 წელს ქვეყნებს შორის სავაჭრო პროდუქტებს შორის იყო ავტომობილები, საწვავი, სპირტიანი სასმელები და ა.შ.

უფრო კონკრეტულად, საქართველოდან სომხეთში ექსპორტირებული ტოპ-5 პროდუქტის ჩამონათვალი ასეთია:

მსუბუქი ავტომობილები - 99.658 მლნ აშშ დოლარი
ეთილის სპირტი არადენატურირებული, სპირტის კონცენტრაციით 80 მოც.%-ზე ნაკლები, სპირტიანი სასმელები - 48.029 მლნ აშშ დოლარი
ნავთობი და ნავთობპროდუქტები - 22.601 მლნ აშშ დოლარი
ბულდოზერები, ავტოგრეიდერები, ექსკავატორები, სატკეპნი მანქანები და სხვა - 22.001 მლნ აშშ დოლარი
სატვირთო ავტომობილები - 14.684 მლნ აშშ დოლარი
სომხეთიდან საქართველოში იმპორტირებული ტოპ-5 პროდუქტი:
მადნები და კონცენტრატები სპილენძის - 68.904 მლნ აშშ დოლარი
ნახევარფაბრიკატები ნახშირბადიანი ფოლადისაგან - 24.017 მლნ აშშ დოლარი
სიგარები, სიგარილები და სიგარეტები თამბაქოს ან მისი შემცვლელებისაგან - 21.622 მლნ აშშ დოლარი
ბოცები, ბოთლები და სხვა მინის ტევადობები - 20.181 მლნ აშშ დოლარი
მადნები და კონცენტრატები ძვირფასი ლითონებისა - 16.616 მლნ აშშ დოლარი

სომხეთი საქართველოსთვის მესამე ადგილზეა შემოსული ტურისტების რაოდენობის მიხედვით. კერძოდ, ტურიზმის ეროვნული ადმინისტრაციის ინფორმაციით, 2024 წელს საქართველოში სომხეთის 948 299 მოქალაქე შემოვიდა, რაც ვიზიტორების ჯამური რაოდენობის 12.7%-ია. თუმცა, წინა წლის მაჩვენებელთან შედარებით, სომხეთიდან შემომსვლელთა რაოდენობა 1,5%-ით არის შემცირებული.

რაც შეეხება ფულად გზავნილებს, 2024 წლის დეკემბერში სომხეთიდან საქართველოში 1.302 მლნ აშშ დოლარი გადმოირიცხა, ხოლო საქართველოდან აღნიშნულ ქვეყანაში 1.042 მლნ აშშ დოლარი ჩაირიცხა. სტატისტიკის მიხედვით, სომხეთი ფულად გზავნილებში საქართველოსთვის 25 ქვეყანას შორისაა.

აღსანიშნავია ისიც, რომ საქსტატის მონაცემებით, 2024 წლის მესამე კვარტალში სომხეთიდან საქართველოში 5.777 მლნ აშშ დოლარის ინვესტიცია განხორციელდა, მეორე კვარტალში 3.481 მლნ აშშ დოლარის, ხოლო პირველ კვარტალში 6.905 მლნ აშშ დოლარის. გამოდის, 3 კვარტალში (IV კვარტალი ჯერ ცნობილი არ არის) ჯამურად 16.163 მლნ აშშ დოლარის სომხური ინვესტიციაა განხორციელებული.

შეგახსენებთ, რომ მთავრობის ადმინისტრაციის ინფორმაციით, დღეს პრემიერ-მინისტრი ირაკლი კობახიძე სომხეთის რესპუბლიკას ეწვევა.

თეგები: ბრუნვა / საქართველო / სომხეთი /

Հեղինակ:

მეცხრე არხი

Երկ.

Երեք.

Չոր.

Հինգ.

Ուրբ.

Շաբ.

Կիր.