თითქოს არასწორად ვმუშაობდით, ეს კანონი შეურაცხმყოფელია“ - მახარე მაცუკატოვი

საზოგადოება

29.07.2024

საზოგადოებრივი ორგანიზაცია „ახალქალაქის ბიზნესცენტრი“ 26 წელია რეგიონში, ეთნიკური უმცირესობების ინტეგრაციაზე, მათ განათლებაზე, სოფლის მეურნეობის განვითარებაზე, დამწყები ბიზნესმენების ხელშეწყობასა და ადგილობრივი თვითმმართველობის მხარდაჭერაზე მუშაობს.

მისი ხელმძღვანელი, მახარე მაცუკატოვი გვიყვება, რომ ამ პერიოდის განმავლობაში, უცხოური დაფინანსებით არაერთი მნიშვნელოვანი პროექტი განახორციელეს და ადგილობრივების ხელშეწყობისათვის სათანადო შედეგებიც მიიღეს. იმ შემთხვევაში, თუ ე.წ „რუსული კანონი“ არ შეჩერდება და ის ქმედებები მოჰყვება, რაც კანონით არის გათვალისწინებული, იძულებული გახდება ორგანიზაციის ლიკვიდაციაზე იფიქროს, რადგან სავალდებულო რეგისტრაციას არ აპირებს.

„მივყვებით დინებას და ველოდებით ეს კანონი რეალობაში როგორ აისახება ჩვენზე. არ დავრეგისტრირდებით და ვნახოთ ოთხი სექტემბრის მერე რა იქნება, თუ არაფერი შეიცვალა აჯობებს ორგანიზაციის ლიკვიდაცია დავიწყოთ, თუ პროგრამები არ მექნება და ვერ ვიმუშავებთ, რა აზრი აქვს ჩვენს არსებობას“- ამბობს მახარე მაცუკატოვი.

ამბობს, რომ 26 წლის განმავლობაში, მხოლოდ საქართველოსა და საქართველოს მოქალაქეების ინტერესებისთვის მუშაობდა, ამიტომ მისთვის „აგენტის“ სტატუსი მიუღებელი და შეურაცხმყოფელია.

,,ვმუშაობდით და ვმუშაობთ, პროექტებში ჩვენი რეგიონის ინტეგრაციისთვის, როგორც ეკონომიკის მხრივ, ისე სოფლის მეურნეობაში, განათლებაში.. ამავე დროს გვქონდა თვითმმართველობის მხარდამჭერი პროექტებიც, ახლა დაგვარქვან აგენტები, თითქოს აქამდე არასწორად ვმუშაობდით და უცხო ქვეყნის ინტერესებს ვატარებდით, ძალიან შეურაცხმყოფელია თავად ფაქტი“- ამბობს „ახალქალაქის ბიზნესცენტრის“ ხელმძღვანელი.

მისივე თქმით, ჯერ კანონის განხილვისა და შემდეგ უკვე მიღების შემდეგ ჯავახეთში, გარკვეული ტენდენციები შეინიშნება. საზოგადოებრივი ორგანიზაციები, რომლებსაც ამა თუ იმ საკითხზე განსხვავებული აზრი გააჩნიათ, მოსახლეობისა თუ სამთავრობო ორგანიზაციების მხრიდან აღიქმებიან როგორც ოპოზიცია, ასევე, ბოლო პერიოდში ადგილობრივმა ხელისუფლებამ მათთან კონტაქტიც შეზღუდა.

„ჩვენ წლების განმავლობაში ვმუშაობდით ადგილობრივების კეთილდღეობისთვის, ასე იყო და ჯერ კიდევ ასეა. სხვადასხვა სამოქალაქო პრობლემა, რომლებზეც ვსაუბრობთ, წინა რიგში წამოვწევთ ხოლმე და განვიხილავთ, მაგრამ ეს არ შეიძლება განიხილებოდეს თითქოს ოპოზიცია ვიყოთ“- ამბობს მახარე მაცუკატოვი.

მახარე მაცუკატოვს, კანონის შეჩერების მოლოდინი არ აქვს. ისიც, სხვა კოლეგების მსგავსად, არჩევნებს ელოდება და ფიქრობს, რომ წინა საარჩევნო პერიოდი ყველასათვის რთული იქნება, თუმცა სწორედ ეს პერიოდი გადაწყვეტს არჩევნების ბედს.

ათიათასობით მოქალაქის, საზოგადოებრივი და მედიაორგანიზაციების წინააღმდეგობის მიუხედავად, საქართველოს პარლამენტმა 14 მაისს კანონი "უცხოური გავლენის გამჭვირვალობის შესახებ" მაინც მიიღო, 28 მაისს კი საქართველოს პრეზიდენტის ვეტო დაძლია. საქართველოს ხელისუფლების წარმომადგენლების მტკიცებით, კანონის მიზანია, უცხოეთიდან შემოსული დაფინანსებები გამჭვირვალე იყოს.

კანონის მიხედვით, ის მედია და საზოგადოებრივი ორგანიზაციები, რომლებიც დაფინანსების 20%-ზე მეტს უცხოელი დონორებისგან იღებენ, იძულებულნი ხდებიან დარეგისტრირდნენ, როგორც "უცხოური ძალის ინტერესების გამტარებელი ორგანიზაცია", წინააღმდეგ შემთხვევაში დაჯარიმდებიან. მსგავსი კანონი 2012 წლიდან მოქმედებს რუსეთში. კანონის ამოქმედების შემდეგ ოკუპანტ ქვეყანაში მრავალი ორგანიზაცია დაიხურა. რუსეთში აღარ არსებობს დამოუკიდებელი მედია და სამოქალაქო საზოგადოება.

როგორც უკვე ცნობილია, საქართველოში მიმდინარე პროცესებს დასავლეთის მხრიდან მძაფრი რეაქცია მოჰყვა. კრიტიკულ განცხადებებთან ერთად, საქართველოს ევროპაში ინტეგრაციის პროცესი შეჩერდა, ამოქმედდა სხვადასხვა სანქციები და ფინანსური შეზღუდვები, როგორც ევროპის ისე ამერიკის მხრიდან. საქართველოში კი პრეზიდენტმა, არასამთავრობო ორგანიზაციის წარმომადგენლებმა და ოპოზიციონერმა დეპუტატებმა, საკონსტიტუციო სასამართლოში სარჩელი შეიტანეს, კანონის შეჩერების მოთხოვნით, რომელსაც სასამართლო დაახლოებით ერთი თვის ვადაში განიხილავს.