ახალციხეში მოსახლეობა ტრანსპორტის გრაფიკზე ჩივის. ადგილობრივები ამბობენ, რომ პრობლემა განსაკუთრებით სოფლის მოსახლეობას ექმნება.

სოფელ ანიდან ახალციხეში ავტობუსი დილის 8 საათზე მოდის, უკან კი პირველზე ბრუნდება. მგზავრი, რომელიც ერთადერთ რეისს ვერ მიუსწრებს, იძულებულია სახლში ტაქსით დაბრუნდეს. ტრანსპორტის ასეთი გრაფიკი მოუხერხებელი განსაკუთრებით, სოფელში მცხოვრები სტუდენტებისთვის და საჯარო მოხელეებისთვისაა.

ქალაქ ახალციხიდან სოფლების მიმართულებით სამარშუტო ტაქსები, დილის შვიდი საათიდან საღამოს 6–მდე მოძრაობენ. შპს “ჯეოტივში” ამბობენ, რომ ტრანსპორტის გრაფიკი, მოსახლეობის ინტერესებიდან გამომდინარე შედგა და ის დისკომფორტს არ ქმნის. ნუგზარ მამუკაშვილი აფსურდს უწოდებს მოსახლეობის ინიციატივას, რომ სოფლების მიმართულებით, საღამოს დამატებითი რეისი დაინიშნოს.

პრობლემა, რომელიც თემის მოსახლეობას აწუხებს, მუნიციპალიტეტის გამგეობას ეხება – ამბობს გურამ მელიქიძე. თუმცა ტრანსპორტის დოტაციის საკითხს, გამგებლის მოადგილე ამ ეტაპზე გამორიცხავს.

მოსახლეობას პრეტენზია აქვს საქალაქო ტრანსპორტის გრაფიკთან დაკავშირებითაც, რომელიც მუშაობას 6 საათზე ასრულებს. ნუგზარ მამუკაშვილი ამბობს, რომ მერიის მოთხოვნის საფუძველზე, ბოლო რეისი 7–ის ნახევარზე გავა. სატრანსპორტო კომპანიაში ამბობენ, რომ მარშრუტს ვერ დაამატებენ, თუმცა სტუდენტებს შეღავათს გაუკეთებენ და სოფლების მიმართულებით ბოლო რეისი 6–ის ნაცვლად, 7–ის 10 წუთზე გავა.