შპს „კეთილმოწყობამ“ გათავისუფლებულ თანამშრომლებს მორიგება შესთავაზა

სამართალი

25.10.2019

შპს „კეთილმოწყობამ“ გათავისუფლებულ თანამშრომლებს, პავლე ათუნაშვილსა და ივანე დავიდოვს მორიგება შესთავაზა. კომპანიის ინტერესებს სააპელაციო სასამართლოში ადვოკატი კახა მათოშვილი იცავს. მისი თქმით, მორიგება მოსამართლემ შესთავაზა, შპს „კეთილმოწყობამ“ კი ორ თანამშრომელს სამსახურში აღდგენის პირობა მისცა.

„მოლაპარაკების ეტაპზე ვართ. ჩვენ ორივეს ვთავაზობთ სამსახურში აღდგენას ხანგრძლივი პერიოდით. განაცდურის ანაზღაურებას ფიზიკურად ვერ შევთავაზებთ, ეს არ განიხილება. პასუხი არ უთქვამთ, არ ვიცი რას მოიფიქრებს მოსარჩელე მხარე. თუ ამ პირობებზე დაგვთანხმდებიან მოვრიგდებით“, - უთხრა „მეცხრე არხს“ კახა მათოშვილმა.

გათავისუფლებული თანამშრომლების ადვოკატი ეკა აბაშიძე ამბობს, რომ მოპასუხე მხარისგან მორიგების შეთავაზება მიიღო, თუმცა მისი დაცვის ქვეშ მყოფებთან დეტალებზე ჯერ არ უმსჯელია.

„უნდა მივიდე და გავერკვიო, რას გვთავაზობენ, რა ნაწილში უნდათ მორიგება. მე ვიცი რა უნდათ ჩემს კლიენტებს, ამიტომ ჯერ „კეთილმოწყობის“ პირობებს მოვუსმენ. წინასწარ არ ვიცი რა შედეგით დასრულდება“, - გვითხრა ეკა აბაშიძემ.

სააპელაციო სასამართლოში სხდომა 13 ნოემბერს არის ჩანიშნული. მხარეები იქამდე უნდა შეთანხმდნენ, წინააღმდეგ შემთხვევაში საქმის განხილვა გაგრძელდება.

პავლე ათუნაშვილი და ივანე დავიდოვი, ოთხ თანამშრომელთან ერთად შპს „კეთილმოწყობიდან“ 2018 წლის 31 დეკემბერს გაათავისუფლეს. სამსახურში აღდგენის და განაცდურის ანაზღაურების მოთხოვნით, სასამართლოს მეეზოვე დავით ლომიძემ და ელექტრიკოსებმა - პავლე ათუნაშვილმა და ივანე დავიდოვმა მიმართეს.
მათი სასარჩელო მოთხოვნა ახალციხის რაიონულმა სასამართლომ დააკმაყოფილა. მოსამართლის გადაწყვეტილებით, შპს“კეთილმოწყობას“ გათავისუფლებული თანამშრომლების სამსახურში აღდგენა და განაცდურის ანაზღაურება დაევალა.

კომპანიამ გადაწყვეტილება სააპელაციო სასამართლოში გაასაჩივრა.

ამავე თემაზე:
შპს“კეთილმოწყობიდან“ გათავისუფლებულმა თანამშრომლებმა სასამართლო მოიგეს
მეეზოვემ შპს“კეთილმოწყობას“ სასამართლო მოუგო
შპს კეთილმოწყობის სამსახურის ექვს თანამშრომელს ხელშეკრულება აღარ გაუგრძელეს