სამაუწყებლო კომპანია "რუსთავი 2" საქართველოს კათოლიკოს პატრიარქის მოწამვლის მცდელობასთან დაკავშირებით, ინფორმაციას ავრცელებს.

დაკავებულია საპატრიარქოს ქონების მართვის სამსახურის ხელმძღვანელი და საპატრიარქოს წმინდა იოაკიმესა და ანას სახელობის სამედიცინო ცენტრის დირექტორი, მამა გიორგი მამალაძე. მისი სასამართლო პროცესი 12 თებერვალს გაიმართა, ინფორმაცია ამის შესახებ რუსთავი 2-ს თბილისის საქალაქო სასამართლოში დაუდასტურეს.

სამაუწყებლო კომპანიის მიერ მოპოვებული ინფორმაციით მამა გიორგი პარასკევს გამთენიისას თბილისის საერთაშორისო აეროპორტში მაშინ დააკავეს, როდესაც მან საზღვარი გადაკვეთა და თვითმფრინავში ჩასაჯდომად ემზადებოდა. ამ დრომდე უცნობია რომელმა უწყებამ, ჩაატარა დაკავების ოპერაცია. შსს-ში აცხადებენ, რომ მამალაძე მათ არ დაუკავებიათ. მთავარ პროკურატურაში კი ამ თემაზე კომენტარს არ აკეთებენ.

რუსთავი 2-ის წყაროს ცნობით, რომელმაც თავისი ვინაობის გამხელა არ ისურვა, მამალაძის დაკავებიდან რამდენიმე საათში ქალაქ ბერლინში საქართველოს სახელმწიფო დაცვის სპეციალური სამსახურის ხელმძღვანელი ანზორ ჩუბინიძე ჩავიდა, რომელმაც საქართველოს პატრიარქის უსაფრთხოების სამსახურის უფროსს, იოსებ ოხანაშვილს საქართველოში დაბრუნება მოსთხოვა, რადგან მთავარ პროკურატურას ოხანაშვილთან კითხვები ჰქონდა. წყაროს ცნობით სოსო ოხანაშვილი საქართველოს მთავარ პროკურატურაში ჩვენების მისაცემად შაბათს გამოცხადდა და მისი 4 საათიანი დაკითხვა გრიფით საიდუმლო საქმეზე მიმდინარეობდა, ხოლო კითხვები პატრიარქის უსაფრთხოების დაცვას ეხებოდა.

ხანგრძლივი დაკითხვის შემდეგ ოხანაშვილმა საქართველო დატოვა და ისევ გერმანიაში გაემგზავრა. სოსო ოხანაშვილი საქართველოს კათოლიკოს-პატრიარქის ძმისშვილის, ბათუმისა და ლაზეთის მიტროპოლიტის, მეუფე დიმიტრი შიოლაშვილის სიძეა.

მეუფე დიმიტრი შიოლაშვილი ასევე გერმანიაში იმყოფება პატრიარქთან ერთად, თუმცა ჟურნალისტების სატელეფონო ზარებს არც ის პასუხობს.

საქართველოს კათოლიკოს-პატრიარქის ქორეპისკოპოსი, მეუფე იაკობი რუსთავი 2-ის შეკითხვას, თუ "ვინ იცავს ახლა პატრიარქს და ადასტურებს თუ არა ის უწმინდესის შესაძლო მოწამვლის მცდელობის ფაქტს," პასუხობს, რომ ახლა "ჭორაობა" არ სურს და ამ თემაზე თბილისში ჩამოსვლის შემდეგ ილაპარაკებს.

"თბილისში რომ დავბრუნდები, ყველაფერი გამოჩნდება რა, მერე შეგიძლიათ დამირეკოთ, ნომერი დავიმახსოვრე თქვენი და პირდაპირ გეტყვით. ახლა აქედან არ მინდა ჭორაობასავით გამომივიდეს. თბილისში რომ ჩამოვალ, აბსოლუტურად ყველაფერი იქნება ნათელი. მადლობა ღმერთს, რომ კარგად იმყოფება," -
აცხადებს მეუფე იაკობი.

რაც შეეხება სრულიად საქართველოს კათოლიკოს-პატრიარქის, მცხეთა-თბილისის მთავარეპისკოპოსის, ბიჭვინთისა და ცხუმ-აფხაზეთის მიტროპოლიტის, უწმინდესისა და უნეტარესი ილია მეორის დაცვას, ამ თემაზე მეუფე იაკობი ამბობს, რომ არ იცის ვინ იცავს ახლა პატრიარქს, ხოლო თავად ტყუილის თქმა არ სურს.

"ახლა იქ იმდენი ეპისკოპოსია, რაში სჭირდება ან ოხანაშვილი და ოხანაშვილის დაცვის ბიჭები. ბევრი ეპისკოპოსია, ისინი ახლობლები არიან. იმათ თვითონ აქვთ თავი დასაცავი, ვინ უნდა დაიცვან," - განაცხადა მეუფე იაკობმა.

საპატრიარქოს ჯანდაცვის დეპარტამენტის უფროსის მოადგილე ცისანა შარტავა პოსტსკრიპტუმთან საუბარში აცხადებს, რომ უწმინდესის მდგომარეობა სტაბილურია და პატრიარქი თავს კარგად გრძნობს. ოპერაცია სრულიად საქართველოს კათოლიკოს-პატრიარქს, მცხეთა-თბილისის მთავარეპისკოპოსს, ბიჭვინთისა და ცხუმ-აფხაზეთის მიტროპოლიტს, უწმინდესსა და უნეტარესს ილია მეორეს დღეს, 13 თებერვალს ბერლინის კლინიკაში უტარდება.