ახალციხისა და ტაო–კლარჯეთის მიტროპოლიტი თეოდორე, ადიგენში, წმინდა მეფე თამარის სახელობის ტაძარში, პარაკლისს აღავლენს,

რის შემდეგ, წმინდა ,,პანტანასა"–ს ხატს ლიტანიობით ღვთისმშობლის სახელობის ზარზმის მამათა მონასტერში გადააბრძანებენ. ,,პანტანასას ღვთისმშობლის" სასწაულმოქმედ ხატს ათონის მთიდან, ზარზმის მონასტრის წინამძღვარი, არქიმანდრიტი ნიკოლოზი 8 მაისს, ხუთ საათზე, დაბა ადიგენში ჩამოაბრძანებს.

მე-17 საუკუნის “ყოველთა დედოფლის-პანტანასას” სასწაულთმოქმედი ხატი ათონის წმინდა მთაზე, ვატოპედის მონასტრის კათოლიკონის ჩრდილო-აღმოსავლეთის სვეტთანაა დაბრძანებული, რომელსაც უამრავი სასწაული აქვს მოხდენილი. ამ ხატთან ლოცვით, ავთვისებიან სიმსივნეთა განკურნების შემთხვევები ხშირია. ხატის მხოლოდ 3 ასლი არსებობს, მათგან ერთი, საქართველოში, 2003 წელს ავჭალის წმინდა ქეთევან წამებულის ეკლესიაში ჩამოაბრძანეს. ეკლესიის წინამძღვარი, მამა გიორგი რაზმაძე იხსენებს, რომ:

“2000 წელს, ათონის წმინდა მთაზე მოგზაურობისას, ვატოპედის მონასტერში გვითხრეს, რომ “პანტანასას ღვთისმშობლის” ხატს დიდი სასწაულები ჰქონდა მოხდენილი. სურვილი, რომ ამ ხატის ასლი საქართველოშიც ყოფილიყო მას შემდეგ გამიღრმავდა, რაც ჩვენი მრევლის წევრი ონკოლოგიური დაავადებით დასნეულდა. მას კურთხევა მივეცი დასნეულებული ადამიანები ენახა და ხელმოწერები მოეგროვებინა. დაახლოებით 2000 ხელმოწერა მოგროვდა, მასში ჩართული იყო ონკოლოგიური საავადმყოფოს როგორც ავადმყოფები, ასევე ექიმები, თანამშრომლები. შედგა სპეციალური წერილი. მაშინ ქორეპისკოპოსის მოვალეობას მიტროპოლიტი იობი (აქიაშვილი) ასრულებდა. მეუფეს ვთხოვეთ და მისი კურთხევით ეს წერილი ვატოპედში გაიგზავნა, ვითხოვდით რომ საქართველოსთვის დაწერილიყო და ავჭალაში, ქეთევან წამებული ეკლესიაში ჩამობრძანებულიყო “ყოველთა დედოფლის-პანტანასას” ორიგინალის ასლი.

ათონის კინოტის გადაწყვეტილებით, გადაწყდა რომ ხატის ასლი საქართველოსთვის შექმნილიყო. მინდა ხაზი გავუსვა იმ გარემოებას, რომ ხატის დაწერა განსაკუთრებული წესების დაცვით ხდება ათონის მთაზე, განსხვავებით საქართველოსგან, რის შედეგადაც უამრავი არაკანონიკური ხატი შემოვიდა ჩვენში. ხატის შექმნა რამოდენიმე წლის განმავლობაში გრძელდებოდა. ის სპეციალურად მისთვის ჩატარებული ღამისთევის ლოცვების ქვეშ იწერებოდა. ბოლო ერთი თვის განმავლობაში კი მასზე დასვენებული იყო სასწაულთმოქმედი ხატის ორიგინალი და ყოველდღე ტარდებოდა საღმრთო ლიტურგია".

პარაკლისის შემდეგ, წმინდა პანტანასას ხატს ლიტანიობით ღვთისმშობლის სახელობის ზარზმის მამათა მონასტერში გადააბრძანებენ.