ახალციხელი ალიკა კურტანიძე მათემატიკური ოლიმპიადის "ევერესტი"–ს გამარჯვებულია. მეხუთე საჯარო სკოლის მეოთხე კლასის მომსწავლემ, საქართველოს მასშტაბით, მეორე ადგილი დაიკავა.

გამარჯვებულს ვერცხლის მედალი, სერტიფიკატი და lenovo tab 3 გადაეცა. გარდა ამისა, გოგა ასკურავას ინგლისური ენის შემსწავლელმა ცენტრმა, იგი ექვსთვიანი უფასო სწავლების კურსით დააჯილდოვა. ასევე, გახდა საქართველოში ერთადერთი რობოტექნიკის, ელექტრონიკისა და პროგრამების ცენტრის სასაჩუქრე აბონემენტის მფლობელი. ბავშვთა და მოზარდთა გასართობმა ცენტრმა კი მეორეადგილოსანი ინდივიდუალური თამაშის ხუთი მოსაწვევით დაასაჩუქრა.

ალიკა კურტანიძე “ევერესტი”–ს რესპუბლიკური ოლიმპიადის გამარჯვებული უკვე მეორედ გახდა. მან საქართველოს მასშტაბით, ჩემპიონის ტიტული მეორე კლასში მოიპოვა. პირველ ადგილოსანს “ვითიბი ბანკისგან” საჩუქრად 500 ლარიანი დაგროვებითი ანაბარი, პლანშეტი და დაბადების დღის ცენტრის 200 ლარიანი ვაუჩერი გადაეცა.

“ევერესტის” გარდა, ალიკა კურტანიძემ მესამე კლასში გამარჯვება მოიპოვა”კინგსი”–ს ოლიმპიადაშიც. წარმატებით გაართვა თავი როგორც მათემატიკის, ასევე ინგლისურის ტურსაც და სამცხე–ჯავახეთის მასშტაბით, პირველი ადგილი დაიკავა.

წელს “ევერესტი”–ს გამარჯვებულები 2016 წლის 30 დეკემბერს გამოვლინდნენ. ალიკა კურტანიძემ მეორე ადგილის მოპოვება 50 000 მონაწილეს შორის შეძლო.

მესამე კლასის ოლიმპიადაში, სამცხე–ჯავახეთიდან ფინალისტებს შორის 27 მოსწავლე მოხვდა. მათ შორის, ახალციხიდან – 14, ბორჯომიდან – 11, ახალქალაქიდან და ადიგენიდან თითო–თითო.

მეოთხე კლასის ფინალისტებს შორის რეგიონიდან 9 მოსწავლე მოხვდა. მათ შორის 6 – ბორჯომიდან, ორი – ადიგენიდან და ერთი – ახალციხიდან. ოქროს ათეულში მეოთხეკლასელებს შორისაა მეხუთე საჯარო სკოლის მოსწავლე გიორგი ივანიძე.

მეხუთე კლასის ფინალისტებს შორის, სამცხე–ჯავახეთიდან 18 მოსწავლე მოხვდა. მათ შორის ბორჯომიდან – 11, ახალციხიდან – 5 და ადიგენიდან – 2. ვერცხლის ათეულის შემადგენლობაში შევიდნენ ბორჯომის მეოთხე საჯარო სკოლის მოსწავლეები: მირიან ბერიძე და სოფიო გოგოლაძე. საუკეთესო ასეულში მოხვდნენ ახალციხის მეხუთე საჯარო სკოლის მოსწავლეები: ნიკა აბულაძე და ლუკა ზედგინიძე, ხოლო ბორჯომის მეოთხე საჯარო სკოლიდან – მირიან გოგოლაძე.

მეექვსე კლასის ფინალისტებს შორის რეგიონიდან 22 მოსწავლე მოხვდა. მათ შორის ბორჯომიდან – 14, ახალციხიდან – 5, ახალქალაქიდან 2 და ადიგენიდან – 1.

მათემატიკური ოლიმპიადა “ევერესტი” ორ სეზონად ტარდება: შემოდგომა ზამთრისა და გაზაფხული–ზაფხულის. თითოეული სეზონი სამ ტურად იმართება. ოლიმპიადაში მონაწილეობას იღებენ II, III, IV, V და VI კლასის მოსწავლეები.