ახალციხელი დავით გასიტაშვილის დასახმარებლად გამართულ საქველმოქმედო სპექტაკლზე ყველა ბილეთი გაიყიდა. რა თანხა შეგროვდა საბოლოოდ, ჯერ უცნობია.

პრემიერა ოჯახში ძალადობის თემაზე სამცხე–ჯავახეთის სამხარეო განვითარების პროგრამის ფარგლებში ურავლისა და მუსხის სასკოლო კლუბებმა დადგეს. ახალგაზრდებს სპექტაკლის მომზადებაში მესხეთის თეატრის თანამშრომლები დაეხმარნენ. სამცხე–ჯავახეთის სამხარეო განვითარების პროგრამის კოორდინატორის თქმით, თეატრისა და მათი ახალგაზრდების დახმარებით 540 ბილეთი გაიყიდა. გარდა ამისა ორგანიზაციებმა თანხა ბილეთების გარეშე გადასცეს.

სპექტაკლისთვის მზადება ურავლისა და მუსხის სასკოლო კლუბების წევრებმა სამი თვის წინ დაიწყეს. თავდაპირველი გადაწყვეტილებით, თეატრალურ წარმოდგენაზე დასწრება ნებისმიერი მსურველისთვის უფასო უნდა ყოფილიყო. თუმცა ავტოსაგზაო შემთხვევის დროს ახალციხელი დავით გასიტაშვილის დაშავების შემდეგ გადაწყდა, რომ სპექტაკლისთვის საქველმოქმედო სახე მიეცათ. შედეგად თეატრი ახალგაზრდა მსახიობებს სავსე დარბაზით დახვდა.

24 წლის დავით გასიტაშვილი 7 მაისს სოფელ რუსთავთან მომხდარი ავტოსაგზაო შემთხვევის დროს დაშავდა. მას გადაუდებელი სამედიცინო დახმარება სჭირდება, რისვისაც ოჯახს შესაბამისი თანხები არ გააჩნია. ფინანსური მხარდაჭერის თხოვნით გასიტაშვილებმა საზოგადოებას 22 მაისს მიმართეს.