«Այսպիսի վերաբերմունքներից խուսափելու համար հեռացա Ռուսաստանից, նույնը չեմ ուզում այստեղ» - Ախալցխացիները «ռուսական օրենքի» մասին

Լուրեր

09.07.2024

Ախալցիխեում գնահատում են Վրաստանի խորհրդարանի կողմից ընդունված «Օտարերկրյա ազդեցության թափանցիկության մասին» օրենքը։ Նրանք միաձայն համաձայն են, որ Վրաստանի ուղին Եվրոպայում է, և նախկին իրավիճակին վերադառնալ չեն ցանկանում։ Տեղացիների խոսքով, Վրաստանի կառավարությունը պետք է հարգի ժողովրդի կարծիքը և նման որոշումներով չշեղվի եվրոպական ուղուց։

«21 տարի ապրել եմ Ռուսաստանում, նման օրենքներով, ազատ կարծիքի սահմանափակումներով և անկարգություններով ապրել չեմ ցանկանում, այդ պատճառով էլ հեռացա։ Այստեղ նույնը չեմ ուզում», - ասում է բնակիչներից մեկը, ով Ռուսաստանի անարդարությունից խուսափելու համար տեղափոխվել է Վրաստան։

Վրաստանում Եվրամիության դեսպանի հայտարարությամբ, Եվրամիությունը կասեցրել է Վրաստանի ինտեգրման գործընթացը և առաջին ֆինանսական սահմանափակումը սահմանել, որը ենթադրում է 30 միլիոն եվրոյի սառեցում։ Գումարը պետք է օգտագործվեր պաշտպանության և անվտանգության ոլորտում։ Դեսպան Պավել Հերչինսկին նաև հայտարարում է, որ եթե երկրում իրավիճակը չլավանա, Եվրամիությունը պատրաստ է մտածել այլ քայլերի մասին։

Չնայած տասնյակ հազարավոր քաղաքացիների, հասարակական և մեդիա կազմակերպությունների հակազդեցությանը, Վրաստանի խորհրդարանն ընդունեց «Օտարերկրյա ազդեցության թափանցիկության մասին» օրենքը մայիսի 14-ին, իսկ մայիսի 28-ին հաղթահարեց Վրաստանի նախագահի վետոն։ Վրաստանի իշխանությունների ներկայացուցիչների պնդմամբ, այս օրենքի նպատակը օտարերկրյա ֆինանսավորումների թափանցիկությունն ապահովելն է:

Օրենքի համաձայն, այն լրատվամիջոցները և հասարակական կազմակերպությունները, որոնք իրենց ֆինանսավորման 20%-ից ավելին ստանում են օտարերկրյա դոնորներից, ստիպված են գրանցվել որպես «օտարերկրյա ուժի շահերը կրող կազմակերպություններ», հակառակ դեպքում՝ կտուգանվեն: Նման օրենքը գործում է Ռուսաստանում 2012 թվականից, որը բազմաթիվ կազմակերպությունների փակման պատճառ է դարձել։ Ռուսաստանում այլևս չկան անկախ լրատվամիջոցներ և քաղաքացիական հասարակություն:

Այսպես կոչված «ռուսական օրենքի» ընդունման պատճառով ԱՄՆ-ն սահմանել է պատժամիջոցներ կառավարության ներկայացուցիչների նկատմամբ։