აბრეშუმის გზა
საქართველო - აზიის მთავარი სავაჭრო კარიბჭე გახდება!
კითხვაა, ბევრი აზრია, თითქოს მომავალიც არ ჩანს, არადა ხელის გულზე გამოჩნდება, თუ ერთიანობაში შევაფასებთ რაღაცეებს, თითქოს ეს ადვილიც არაა... მაშ დავიწყოთ.
ილია ჭავჭავაძე ლიბერალი იყო, გრიგოლ ორბელიანი კონსერვატორი და წინააღმდეგობაში მოდიოდა ილიასთან. ლიბერალობას შეეწირა ილია და ამ შეწირვამ მოიტანა პირველი რესპუბლიკა ჩვენი. ზვიად გამსახურდიაც ლიბერალი იყო და მისმა შეწირვამაც იგივე მოიტანა.
ამერიკელი დემოკრატები ლიბერალები არიან, რესპუბლიკელები კონსერვატორები. დემოკრატებისაა უძველესი აბრეშუმის გზის აღდგენის პროექტი. თავისთავად მათ საკუთარი ინტერესები აქვთ, რამეთუ ქვეყნებს ერთმანეთთან მეგობრობა კი არა, საერთო ინტერესები აკავშირებთ. დემოკრატები თავისუფალ ბაზარს აძლიერებენ და ისინი თვლიან, რომ თავისუფალი ვაჭრობისთვის ერთი კი არა, ბევრი გზა და სარტყელი უნდა არსებობდეს. კონკურენცია უბიძგებს ქვეყნებს განვითარებისკენ და ასეთებს ისინი მოკავშირეებად მოიაზრებენ.
ეკონომიკა საქონელგაცვლის გარეშე არ არსებობს. ის არ ვითარდება იაფი სესხებით და სამთავრობო გრანტებით. ეკონომიკა ინვესტიციებით ვითარდება. ინვესტიციებს მოჰყვება ტექნოლოგიები. გადაწყვეტილებები კი კაბინეტებში კი არა და ბაზრებზე მიიღება. ინვესტიცია მიმზიდველია მხოლოდ თავისუფალ ბაზრებზე, ასეთი კი კერძო საკუთრების გარეშე არ არსებობს.
შეგახსენებთ, რომ 40 ჰა სავარგული აქვს საშუალოდ ევროპელ ფერმერს საკუთრებაში. საქართველოში კი 1,4 ჰა და ისიც ცხრა ადგილას გაფანტული. არც ლოჯისტიკურად და არც ფინანსურად არ მართლდება ეს მოცემულობა. საქმე ისაა, რომ საშუალოდ ერთი ამერიკელი ფერმერი 79 თანამოქალაქეს კვებავს, ევროპელი - 67-ს, რუსი - 15-ს, ქართველი გლეხი კი - 0,85-ს. ის თავის თავსაც ვერ არჩენს, არადა ტექნოლოგიების ეპოქაში ვართ. გლეხობა ტეხავს.
ნიდერლანდებში, საფრანგეთში, შვედეთში, ესტონეთში არათუ მიწები, არამედ ტყეები და ტბებიც კერძო საკუთრებაშია. მაღალი საკანონმდებლო ნორმატივებით ტყის რესურსები, მათ შორის ნეშომპალა, აგრარულ წარმოებაშია ჩართული, პროდუქტის ფასი და ხარისხი კი თავის საქმეს აკეთებს.
სამეზობლო
შთაბეჭდილებაა ეგეთი - თურქეთი აზერბაიჯანს დაეხმარა, რათა საკუთარი სიძლიერის დემონსტრირება მოეხდინა...
არ სჭირდება დემონსტრირება თურქეთს, ისეც იცის ყველამ მისი მაღალი შესაძლებლობები. საქმე ისაა, რომ მან თავისი ჯარი განალაგა სატრანზიტო მიმართულებით. როგორც ვთქვით, არ არსებობს ქვეყნებს შორის მეგობრობა, არსებობს ინტერესები. ამბობენ, ლაზიკა ანკარის ინტერესებთან წინააღმდეგობაშიაო. საქმე ისაა, რომ ყველა ძირითადი აზიური ტვირთი, რომელიც შავ ზღვას ან მცირე აზიას გადაკვეთს, ბაქოს გავლით უნდა წამოვიდეს. აზერბაიჯანი კი მსოფლიო ბანკის შეფასებით ქვეყნებს შორის 31-ე ადგილზეა სატრანსპორტო-ლოჯისტიკური ინფრასტრუქტურის ინდექსით. ანკარას თავისი ინტერესები აქვს ბაქოში, თადარიგი დაიჭირა სამომავლოდ და სატრანზიტო არტერიებზე თავისი გავლენის დამყარებას ცდილობს, თან მოკავშირეობა გაიმყარა ბაქოსთან, თან ახალი შესაძლებლობა გააჩინა ნახჭევანის გავლით.
ახლა დავუბრუნდეთ ისევ ამერიკას. ცივილიზებული სამყარო დემოკრატი კანდიდატისკენ იხრებოდა. ისინი გააძლიერებენ აბრეშუმის გზის პროექტს. სავარაუდოდ, ესეც ადრევე გათვალა ანკარამ. ნატოს პლატფორმაში ანკარაც და ვაშინგტონიც უცებ დალაგდებიან. მოსკოვის გავლენა და რუსეთის სარკინიგზო დერეფნის როლი მცირდება, ის კიდევ უფრო შემცირდება. ირანი თუ ჭკვიანად მოიქცევა, ისიც ჩაჯდება აბრეშუმის გზის ჩარჩოში. ამისთვის დრო დაჭირდება მას.
რისკები
ჩვენში ფიქრობენ, რომ შესაძლოა მომავალში სომხეთის გავლით დაკავშირდეს სტამბოლი ბაქოსთან, თუ სომხეთის უკიდურეს სამხრეთში, ირანის საზღვართან განვითარდა სატრანსპორტო არტერიები... ასეთ მაგისტრალს ერთ ზოლში არავინ დააფინანსებს. დივერსიული რისკების აცილების მიზნით, ანუ რომ წარმოვიდგინოთ ერთ ზოლში ერთად თავმოყრილი რკინიგზა, ავტობანი, მილსადენები, ბოჭკოვანი ინტერნეტი... ასეთ ინვესტიციას არავინ გარისკავს. თურქეთი-ნახჭევანის საზღვრის სიგრძეც 13 კმ-ია, რელიეფიც რთული.
რაც შეეხება ზოგადად სატრანზიტო არტერიებს სომხეთის გავლით, ეს შესაძლოა კარგიც კი იყოს... და აი რატომ? ტვირთები ძალიან ბევრია... იქნება ტვირთები, რომელთა გადაზიდვები ანაკლიის გავლით რუმინეთის, ბულგარეთის და უკრაინის პორტებით უნდა გაგრძელდეს ევროპისკენ. ანუ, ეს ტვირთები ანკარის ინტერესებში ვერ იქნება. იქნება ტვირთები, რომლებიც ანაკლიის გავლით სტამბოლის პორტში უნდა შევიდეს, გადამუშავდეს და განაწილდეს. იქნება ისეთებიც, რომელსაც ანაკლია თავად მოემსახურება. კიდევ სხვა ტვირთებიც იქნება, რომელიც ბაქო-თბილისი-ყარსის რკინიგზის გავლით მერსინის, სტამბოლის პორტებში ჩავა და იქიდან განაწილდება.
ეს პროცესი კავკასიის შეკავშირებულობის საჭიროებას ქმნის. სომხეთი მიხვდება, რომ მოსკოვში შესაძლებლობები არ იჭედება. თავისთავად რთული იქნება ამის აღქმა მისთვის, ამას დრო დაჭირდება.
ამერიკელი დემოკრატები კი გააგრძელებენ საქართველოს მხარდაჭერას სამი მიმართულებით - საბაზრო (კერძო საკუთრება, ბირჟები), დემოკრატიული ინსტიტუტები და სამხედრო (ნატო).
ეს ამბები საქართველოს მთავრობებს არ ეხება მარტო, მთავრობები მოდიან და მიდიან, წავლენ და მერე სხვები მოვლენ, მერე კიდევ... და სულ ასე იქნება. ეს ამბავი ჩვენ გვეხება, მოქალაქეებს. რაც ნიშნავს, რომ ამერიკელი ხალხი იქიდან უკვეთავს საერთაშორისო უსაფრთხოებას. ჩვენ აქ უნდა ვუპასუხოთ გამოწვევას მეგობარო, მე და შენ პირადად... ვინც ეს ბლოგი წაიკითხე.
საქართველო დაიბრუნებს თავის ისტორიულ სახელმწიფო ფუნქციას და გახდება ევროპა-აზიის მთავარი სავაჭრო კარიბჭე! თბილისი უნდა მოემზადოს ამისთვის! ქარავანი არ ჩერდება, ქარავანი მიდის...
Տարածեք :