საცხოვრებელი ბინები წინა წელთან შედარებით 8.2%-ით გაძვირდა

ეკონომიკა

საცხოვრებელი ბინები წინა წელთან შედარებით 8.2%-ით გაძვირდა – საქსტატი

24.07.2022

საქართველოს სტატისტიკის ეროვნული სამსახურის განცხადებით, 2022 წლის მეორე კვარტალში წინა კვარტალთან შედარებით საცხოვრებელი უძრავი ქონების ფასების ინდექსი 0.7 პროცენტით გაიზარდა, ხოლო ინდექსის წლიურმა ზრდამ 4.5 პროცენტი შეადგინა.

ამავე სტატისტიკის მიხედვით, 2020 წლის საშუალოსთან შედარებით ინდექსი 13.9 პროცენტით არის გაზრდილი. საქსტატში აღნიშნავენ, რომ უძრავი ქონების ფასების ინდექსის დაფარვა შემოიფარგლება ქ. თბილისით და მოიცავს მხოლოდ ახალი საცხოვრებელი უძრავი ქონების ბაზარს, როგორც მრავალსართულიანი სახლების (ბინების), ისე კერძო სახლების სეგმენტებს.

ქვემოთ მოცემულ ცხრილში წარმოდგენილია უძრავი ქონების ფასების პროცენტული ცვლილება წინა კვარტალთან, წინა წლის შესაბამის კვარტალთან და 2020 წლის საშუალოსთან შედარებით:

სტატისტიკის ეროვნული სამსახურის თქმით, რაც შეეხება ჩაშლილ მონაცემებს, 2022 წლის მეორე კვარტალში წინა კვარტალთან შედარებით ფასების ზრდა დაფიქსირდა საცხოვრებელი ბინების სეგმენტში 2.2 პროცენტით, ამავე პერიოდში კი, ფასები შემცირდა კერძო სახლების სეგმენტში -2.4 პროცენტით.

საქსტატში აღნიშნავენ, რომ 2021 წლის მეორე კვარტალთან შედარებით ფასების ზრდა დაფიქსირდა ბინების სეგმენტში 8.2 პროცენტით, ხოლო კერძო სახლების სეგმენტში ფასები შემცირდა 3.5 პროცენტით.

საქსტატში აღნიშნავენ, რომ ინდექსის გამოთვლა ლარში ხდება, შესაბამისად, მის დადგენაზე გავლენა ლარის ბოლოდროინდელმა გამყარებამაც მოახდინა გავლენა.

ბინების გაძვირების შესახებ, ,,თიბისი კაპიტალის" კვლევაც მოწობს. 2022 წლის ივნისში გასული წლის ანალოგიურ პერიოდთან შედარებით, თბილისში ქირის ფასი 79%-ით არის გაზრდილი. მათივე ცნობით, წელს ქირის ფასი 1კვ.მეტრზე 8.5 აშშ დოლარია.

რაც შეეხება გასაყიდ ფასს, უძრავი ქონების ღირებულება წლიურად 16%-ით არის გაზრდილი. 2022 წლის ივნისის მონაცემებით, დედაქალაქში 1 კვ.მეტრის ყიდვის საშუალო ღირებულება 926 აშშ დოლარს შეადგენს.

ამასთან, „თიბისი კაპიტალის“ ცნობით, საანგარიშო პერიოდში თბილისში უძრავი ქონების გაყიდვები 6%-ით არის გაზრდილი. მიმდინარე წლის ივნისში ჯამში - 3 557 ტრანზაქცია დაფიქსირდა.

კვლევის თანახმად, 2022 წლის ივნისის მონაცემებით, რაიონები თბილისში, სადაც ყველაზე მეტი საცხოვრებელი უძრავი ქონება გაიყიდა, არის: ნაძალადევი - 31%-იანი ზრდა, საბურთალო - 24% და კრწანისი - 13%-იანი ზრდა.

რაც შეეხება ღირებულებას, წინა თვეში საცხოვრებელი უძრავი ქონების გასაყიდი ფასი თბილისში ყველაზე მეტად - 23%-ით გაიზარდა ჩუღურეთის რაიონში, მას მოსდევს მთაწმინდა - 20%-იანი ზრდით, მე-3 ადგილზე კი გლდანია, სადაც ფასი წლიურად 19%-ით არის გაზრდილი.