საქართველოში ადგილობრივი ვიზიტორების რაოდენობა იზრდება

ეკონომიკა

29.08.2024

2024 წლის მეორე კვარტალში საქართველოს ტერიტორიაზე 15 წლის და უფროსი ასაკის ადგილობრივი ვიზიტორების საშუალო თვიური რაოდენობა 1 367 200-ით განისაზღვრა, რომელთა მიერ ქვეყნის ტერიტორიაზე განხორციელებული ვიზიტების საშუალო თვიურმა რაოდენობამ 1 699 300 ერთეული შეადგინა. ამის შესახებ მონაცემებს სტატისტიკის ეროვნული სამსახური აქვეყნებს.

მათივე ცნობით, აღნიშნულ პერიოდში ვიზიტორების საშუალო თვიური რაოდენობა გაიზარდა 6 პროცენტით, ხოლო მათ მიერ განხორციელებული ვიზიტების რაოდენობამ 6.2 პროცენტით გადააჭარბა წინა წლის ანალოგიური პერიოდის მაჩვენებელს.

„2024 წლის მეორე კვარტალში საქართველოს რეზიდენტი ვიზიტორების მიერ საქართველოს ტერიტორიაზე განხორციელებული ტურისტული ტიპის ვიზიტების საშუალო თვიური რაოდენობა 722.9 ათასით განისაზღვრა, რაც 7.8 პროცენტით მეტია წინა წლის ანალოგიური პერიოდის მაჩვენებელზე.2024 წლის მეორე კვარტალში ვიზიტორების 36.2 პროცენტი 31-50 წლამდე ასაკობრივ კატეგორიას მიეკუთვნებოდა. ამასთან, ქალების რაოდენობა ვიზიტორების ჯამური რაოდენობის 56.3 პროცენტს შეადგენდა.გამოკვლევის შედეგების მიხედვით, ვიზიტორების 39.2 პროცენტი თბილისის მაცხოვრებელია, 16 პროცენტი მოდის იმერეთის, რაჭა-ლეჩხუმისა და ქვემო სვანეთის რეგიონზე, 8.6 პროცენტი - ქვემო ქართლის რეგიონზე, ხოლო დანარჩენი რეგიონები შედარებით დაბალი წილებით არის წარმოდგენილი" - ნათქვამია სტატისტიკის ეროვნული სამსახურის მიერ გამოქვეყნებულ განცხადებაში.

საანგარიშო პერიოდში ყველაზე მეტი ვიზიტი განხორციელდა თბილისში და იმერეთის რეგიონში.

2024 წლის მეორე კვარტალში განხორციელებული ვიზიტებისას გაწეული საშუალო თვიური ხარჯების მოცულობა განისაზღვრა 264.2 მილიონი ლარით. აღნიშნული მაჩვენებელი 13.2 პროცენტით მეტია გასული წლის ანალოგიური პერიოდის მაჩვენებელზე. ამასთან, ერთ ვიზიტზე გაწეული საშუალო ხარჯი გაიზარდა 6.6 პროცენტით და 155.5 ლარს გაუტოლდა.